ئەو گەنمەی عێراق لە جووتیارانی وەرناگرێت حکومەتی هەرێمی کوردستان بە بازاڕی دەکات

ئاڤا نیوز

 

ئەو گەنمەی كە حكومەتی عێراق لە جوتیارانی هەرێمی كوردستانی وەرنەگرتووە، بە بڕیاری حکومەتی هەرێمی کوردستان و لە ڕێگەی دوو کۆمپانیای ناوخۆوە وەردەگیردرێت.

 

چیرۆکی سەرەکی: حکومەتی عێراق بۆ ئەمساڵ تەنیا 400 هەزار تۆن گەنمی جووتیارانی کوردستانی وەرگرت، لەبەرامبەردا بەرووبوومی گەنمی ئەمساڵ زۆر زیاتر بوو، بۆیە حکومەتی هەرێمی کوردستان لە ڕێگەی هەردوو کۆمپانیای خۆشناو و قەیوانەوە ئەو گەنمەی ماوەتەوە، دەكڕێت.

 

ڕاگەیێنراوی فەرمی: وەزارەتی کشتوکاڵ و سەرچاوەکانی ئاوی هەرێمی کوردستان، جووتیارانی ئاگادار كردووەتەوە كە ئەنجوومەنی وەزیران ڕەزامەندی لەسەر وەرگرتنی گەنمی ماوەی جووتیاران داوە. وەرگرتنەكەش لە 15/7/2025 دەست پێدەکات و مانگێك دەخایەنێت، جووتیارانیش لە ماوەی دوو مانگدا واتە لە ڕێکەوتی وەرگرتنی گەنمەکەیانەوە پارەكەیان وەردەگرن.

 

زانیاریی زیاتر: ئەو گەنمەی لە جووتیاران وەردەگیرێت دەبێت بەپێی تایبەتمەندی و پێوەری عێراقی بێت. یەك تەن گەنمی پلە یەک بە 550 هەزار دینار و پلە دووش 525 هەزار دینار دەبێت.

 

شێوازی جێبەجێکردن: پێویسته جووتیار پشتگیری بنکەی کشتوکاڵی و بڕی گەنمی وەرگیراو لە سایلۆکانیان پێ بێت و بڕی گەنمی وەرنەگیراویش تۆمار کرابێت.