وەزارەتی پەروەردە لەڕێگەی ئاڤاوە ڕوونکردنەوە لەسەر هەڵەی پرسیارەکانی پۆلی 12 دەدات

ئاڤا نیوز

چەند قوتابیەکی پۆلی 12ـی ئامادەیی دەڵێن لە تاقیکردنەوەی کۆتایی، لە پرسیارەکانی هەریەکە لە بایەلۆجی و ئینگلیزی چوار پرسیاری هەڵە هەبووە، لایەنی بەرپرسیش دەڵیت، هەرچی لە بەرژەوەندی قوتابیاندا بێت دەیکەن و ناهێڵن باجی کەموکوڕی ئەوان قوتابی بیدات.

لێدوانی فەرمی: د. سەیوان عەلی، سەرۆکی لیژنەی باڵای تاقیکردنەوەکان لە وەزارەتی پەروەردە بە ئاڤا میدیای گوت: لە لیژنەی باڵای تاقیکردنەوەکان بە بەشداری چەند مامۆستایەکی پسپۆر پێداچوونەوە بە پرسیارەکانی بایەلۆجیدا کراوە، دەرکەوت هیچ هەڵەیەک لە پرسیارەکان نەبووە.

د. سەیوان دەڵێت: بە بەشداری هەشت مامۆستای پسپۆڕی ئینگلیزی پێداچوونەوەمان بە پرسیارەکانی ئینگلیزی کردووە، وەک هەڵە پرسیاری هەڵە نییە، بەڵام پرسیاری چل، سێ وەڵامی بۆ دەبێت هەرچەندە ڕاستترین وەڵام هەڵبژاردنی چوارەمە واتە D، بەڵام لەبەر بەرژەوەندی قوتابیان  B  و C ـیشمان بە ڕاست داناوە.

زانیاریی زیاتر: بە گوتەی سەرۆکی لیژنەی باڵای تاقیکردنەوەکان، پرسیاری سێیەمی ئینگلیزی هەڵەی چاپی هەبووە لە جیاتی  His wif  نوسراوە her wife.

دڵنیاییش دەداتە قوتابیان و دەڵیت هەرچی لە بەرژەوەندی قوتابیاندا بێت دەیکەن و ناهێڵن باجی کەموکوڕی ئەوان قوتابی بیدات.