ویتکۆف لەبارەی دانوستانەکانی غەززە گەشبینە

ئاڤا نیوز

هەوڵەکان بۆ گەیشتن بە ڕێککەوتن لە غەززە بەردەوامن، بەڵام هیچ دەرئەنجامێکی پێشکەوتوو تاوەکو ئێستا بەدەست نەهێنراوە، نێردەی ترەمپیش لەبارەی دانوستانە بەردەوامەکان گەشبینی دەردەبڕێت.

وێنە گەورەکە: لە هەفتەی ڕابردووەوە دانوستانەکانی ئیسرائیل و حەماس بۆ ڕاگەیاندنی ئاگربەستێکی گشتگیر و ئازادکردنی بارمتەکان لە دەوحەی قەتەر بەردەوامن، بەڵام هەردوولا یەکتر لەسەر ئاستەنگ دروستکردن بۆ دانوستانەکان تۆمەتبار دەکەن.

زانیاریی بەدەستهاتوو: ستیڤ ویتکۆف، نێردەی ترەمپ بۆ کاروباری ڕۆژهەڵاتی ناوەڕاست، گەشبینی خۆی سەبارەت بە دانوستانەکانی ئاگربەست لە غەززە دەربڕی، هاوکات وتیشی لەبارەی دوایین پەرەسەندنەکان لە پەراوێزی یاری کۆتایی جامی جیهانی یانەکان لەگەڵ بەرپرسێکی باڵای قەتەر کۆدەبێتەوە.

لەلایەکی دیکەوە: سەرچاوەیەکی فەلەستینی لەبارەی دانوستانەکان ئاشکرای کرد، دانوستانەکانی دەوحە بەهۆی پێداگریی ئیسرائیل لەسەر نەکشانەوەی لە کەرتی غەززە ڕووبەڕووی بەربەست و ئاستەنگ بووەتەوە و ئیسرائیل داوا دەکات لە 40% خاکی غەززە بمێنێتەوە، بەڵام حەماس ئەمە ڕەتدەکاتەوە و بە داگیرکاری ناوی بردووە.