خامنەیی: هێرشەکانی ئیسرائیل بۆ سەر ئێران بۆ ڕووخاندنی سیستمی ئیسلامی بوو

ئاڤا نیوز

ڕێبەری باڵای کۆماری ئیسلامی ئێران ڕایگەیاند، هێرشەکانی مانگی ڕابردووی ئیسرائیل بۆ سەر ناوچە جیاوازەکانی ئێران بۆ لاواز کردن و ڕووخاندنی سیستمی ئیسلامی بوو.

وێنە گەورەکە: سەڕەرای ڕاگەیاندنی ئاگربەست لە نێوان ئیسرائیل و ئێران، بەڵام هەردوو وڵات دوای شەڕی 12 ڕۆژە هێشتا هەڕەشە و هۆشداری بە یەکتر دەدەن و متمانەیان بە ئاگربەست نییە، عەلی خامنەیی دەڵێت، ئامانجی ئیسرائیل ئاشکرا بوو، بەڵام سەرکەوتوو نەبوون.

لێدوانی فەرمی: عەلی خامنەیی، ڕێبەری باڵای کۆماری ئیسلامی ئێران ڕایگەیاند: ئیسرائیل لە هێرشەکانی ئامانجی ئەوە بوو کە بەهۆی هێرشەکانەوە نائارامی و ئاڵۆزی بخاتە نێو ئێران و پێیان وابوو بەهۆی هێرشەکانەوە خەڵک دێتە سەر شەقام و کۆماری ئیسلامی ئێران دەڕوخێنن.

لەلایەکی دیکەوە: خامنەیی گوتی، ئێران ئامادەیە بۆ وەڵامدانەوەی هەر هێرشێکی سەربازی نوێ و توانای ئەوەی هەیە گورزێکی بەهێزتر و کوشندەتر لە نەیارەکانی بدات وەک ئەوەی لە ئیسرائیلی دا.