کەمی کارەبا عێراق دەخاتە سەر لێواری تووڕەیی جەماوەری

ئاڤا نیوز

بەهۆی خراپیی دۆخی کارەباوە، ناوەندێکی ئەمریکی، پێشبینیی خۆپێشاندانێکی جەماوەری گەورە لە چەندین ناوچەی عێراقدا دەکات.

وێنە گەورەکە: چەند ڕۆژێکە لە پارێزگاکانی نەجەف، کەربەلا، دیوانییە، بابل، بەسرە و زیقار، بەهۆی خراپیی دۆخی کارەباوە خۆپێشاندانی جیاواز لە قەبارەدا لەلایەن هاووڵاتییانەوە ڕێکدەخرێت، بەپێی زانیارییەکانیش تاوەکو ئێستا ئەو خۆپێشاندانانە سنووردارە و هیچ گرژییەکی لێنەکەوتووەتەوە.

ڕاگەیێنراوی فەرمی: ناوەندی (RANE)ـی ئەمریکی ئەمڕۆ چوارشەممە 2025-07-16، لە شیکارییەکدا بڵاویکردووەتەوە، بەهۆی خراپیی دۆخی کارەباوە، پێشبینیی خۆپێشاندانێکی جەماوەری گەورە لە زۆربەی پارێزگاکانی عێراق دەکرێت.

زانیاریی زیاتر: ناوەندەکە ڕوونیکردەوە ئەم ناڕەزاییەتیانەی بەهۆی بەرزبوونەوەی بەرچاوی پلەکانی گەرما و پچڕانی کارەباوە سەریان هەڵداوە  و ئێستا بەشێکی زۆری پارێزگاکانی عێراقی گرتووەتەوە، تاوەکو ئێستا سنووردارن، بەڵام پێشبینی دەکرێت لە ڕۆژانی داهاتوودا بەشێوەیەکی بەرچاو گەشە بکەن.

لە بەشێکی دیکەی شیکارییەکەی، ناوەندەکە ئەوەشی خستەڕوو، بەردەوامبوونی خۆپیشاندانەکانی ئێستا، دەبێتە هۆی سەرهەڵدانی خۆپیشاندانی زۆر گەورەتر، بەتایبەت حکومەتی عێراق، لەڕێگەی وەزارەتی کارەباوە، بەردەوامە لە هێنانەوەی پاساو بۆ کەمبوونەوەی کارەبا، بەبێ ئەوەی هیچ چارەسەرێک پێشکەش بکات.