فایلی خەڵک؛ دوو گەڕەکی دهۆك کێشەی فڕێنەدانی زبڵ و خاشاکیان هەیە

ئاڤا نیوز

هەردوو گەڕەکی ئێمینکێ و بەرێ بەهار لە رۆژهەڵاتی شاری دهۆک، کێشەی فڕێنەدانی زبڵ و خاشاکیان هەیە و جێگری پارێزگاریش دەڵێت، لەم یەک دوو ڕۆژە کێشەکەیان چارەسەر دەبێت.

بەدواداچوونی ئاڤا: ڕۆژهات لوقمان ،پەیامنێری ئاڤا چووەتە نێو هەردوو گەڕەک و دەڵێت، بڕێكی زۆر زبڵ و خاشاک كە چەندین ڕۆژە فڕێنەدراون، لە كۆڵانەكانی ئەو گەڕەكانە كۆبووەتەوە، بۆنێكی ناخۆشیان دروست كردووە و دانیشتووانی ناوچەكەی هەراسان كردووە.

لێدوانی فەرمی: مێهڤان تەحسین، دانیشتووی گەڕەكی ئێمینکێیە بە ئاڤای وت، "لە جەژنى قوربانەوە تاوەكو ئێستا زبڵ لە گەڕەکەکەمان فڕێنەدراوە، چەندین جار داوای چارەسەرمان كردووە و تاوەكو ئێستا ئەو گرفتەمان چارەسەر نەكراوە.

بۆچوونی لایەنی بەرامبەر: ماجید سەید ساڵح، جێگرى پارێزگارى دهۆک بە ئاڤای گوت، "ئەو كۆمپانیایەی كاری پاككردنەوە و فڕێدانی زبڵی ئەو گەڕەكانەی پێسپێردراوە، کێشەی پێنەدانی پارەی هەبوو، بەڵام ئێستا پارەکە خەرج کراوە و لە یەك دوو ڕۆژی داهاتوودا كۆمپانیاكە دەستبەكار دەبێتەوە و گرفتەكەش چارەسەر دەبێـت".