وەزارەتی ناوخۆی عێراق: 14 تەرمی ڕووداوەکەی واست ناناسرێنەوە

ئاڤا نیوز

 

وەزارەتی ناوخۆی عێراق ڕایگەیاند، لە ڕووداوەکەی واست 61 کەس گیانیان لەدەست داوە و 14 کەسیان بەهۆی زۆری ڕێژەی سوتاوییەکەیان تەرمەکانیان نەناسراوەتەوە، هاوکات 45 کەسیش ڕزگارکراون کە لەناو باڵەخانەکەدا گیریانخواردبوو.

 

چیرۆکی سەرەکی: شەوی ڕابردوو لە پارێزگای واستی ناوەڕاستی عێراق، ئاگرێکی گەورە لە مۆڵێک کەوتەوە و بەهۆیەوە زیاتر لە 61 کەس گیانیان لەدەست دا و 40ی دیکەش برینداربوون.

 

ڕاگەیێنراوی فەرمی: وەزارەتی ناوخۆی عێراق لەبارەی ڕووداوەکەی واست ڕایگەیاند، باڵەخانەکە لە پێنج نهۆم پێکهاتووە و بریتیی بووە لە چێشتخانە و هایپەرمارکێت، حەوت ڕۆژ بووە کراوەتەوە و لە ئەنجامی ئاگرکەوتنەوەکەش 61 کەس گیانیان لەدەست داوە.

 

بەگوێرەی وەزارەتی ناوخۆ، زۆرینەیان لە دەستشۆرەکانی ناو باڵەخانەکە بەهۆی دووکەڵەوە خنکاون، لەناو ئەوانەشی مردوون 14 کەسیان بەهۆی زۆری ڕێژەی سوتاوییەکەیان تەرمەکانیان نەناسراوەتەوە.

 

تیمەکانی بەرگری شارستانی توانیوویانە 45 کەس ڕزگار بکەن کە لەناو باڵەخانەکەدا گیریانخواردبوو.

 

ئەوەی پێویستە بیزانیت: لیژنەیەکی باڵا بەسەرۆکایەتیی ڕاوێژکاری هونەریی وەزیری ناوخۆی عێراق و ئەندامیەتی تیمەکانی بەڵگەی تاوان و گەورە لێکۆڵەر و شارەزایان پێکهێنراوە، تا هۆکاری ڕووداوەکە ئاشکرا بکرێت و بەرپرس و ئەوانەشی کەمتەرخەم بوون، سزابدرێن.