عێراق لە 6 مانگدا بە بەهای زیاتر لە 27 ملیار دۆلار نەوتی فرۆشتووە

ئاڤا نیوز

هەناردەکانی نەوتی عێراق لە نیوەی یەکەمی ساڵی 2025دا، گەیشتووەتە زیاتر لە 600 ملیۆن بەرمیل و بەهاکەشی بۆ عێراق زیاتر لە 27 ملیار دۆلار بووە.

وێنە گەورەکە: عێراق بۆ بودجەی ساڵانەی بە شێوەیەکی سەرەکی پشت بە فرۆشتنی نەوت دەبەستێت، کە ڕێژەکەی دەگاتە نزیکەی 90%، ئەوەی دیکە بە داهاتی نانەوتی پڕی دەکاتەوە، لەگەڵ ئەوەش هەموو ساڵێک لە خشتەکانی بودجە بەهۆی هەستان و دابەزینی نرخی نەوتەوە کورتهێنانی بۆ دروست دەبێت.

بڵاوکراوەی فەرمی: بەگوێرەی ئەو ئامارانەی کە کۆمپانیای "سۆمۆ" بڵاوی کردووەتەوە "کۆی گشتیی هەناردەکانی نەوتی عێراق لە ماوەی نیوەی یەکەمی ساڵی 2025دا، گەیشتووەتە 606 ملیۆن و 582 هەزار و 373 بەرمیل، بە تێکڕای مانگانەی 101 ملیۆن و 97 هەزار و 62 بەرمیل."

"کۆی گشتیی نەوتی هەناردەکراو لە کێڵگەکانی بەسرە و ناوەڕاستەوە لە ڕێگەی بەندەرەکانی بەسرەوە گەیشتووەتە 590 ملیۆن و 262 هەزار و 866 بەرمیل، لەکاتێکدا کۆی گشتیی هەناردەکراو لە کێڵگەی گەیارەوە لە کەرکووک 5 ملیۆن و 692 هەزار و 331 بەرمیل بووە."

ژمارەکان وادەڵێن: بەگوێرەی داتاکانی سۆمۆ، "هەناردەکانی نەوت لە کۆگای نوێی کەرکووکەوە بۆ ئوردن لە ماوەی ئەم شەش مانگەدا گەیشتووەتە یەک ملیۆن و 866 هەزار و 194 بەرمیل"، هەروەها "داهاتە داراییەکانی هەناردەی مانگەکانی ئازار، نیسان، ئایار و حوزەیران گەیشتووەتە 27 ملیار و 514 ملیۆن و 474 هەزار و 242 دۆلار."