دیداری نێوان مەزڵووم عەبدی و شاندی حکومەتی سووریا لە فەرەنسا دواخرا

ئاڤا نیوز

دیداری نێوان دەستەی دانوستانی ڕۆژئاوای کوردستان و باکوور و ڕۆژهەڵاتی سووریا بەسەرۆکایەتی مەزڵووم عەبدی لەگەڵ شاندی حکومەتی سووریا کە بڕیاربوو لە فەرەنسا بکرێت، بەهۆکارێکی نادیار بۆ کاتێکی دیکە دواخرا.

چیرۆکی سەرەکی: بەمەبەستی یەکلاییکردنەوەی کێشەکانی نێوان ئیدارەی باکوور و ڕۆژهەڵاتی سووریا و دیمەشق بەتایبەتیش تێکەڵکردنی هێزەکانی هەسەدە و دامەزراوە مەدەنییەکانی لەگەڵ حکومەتی سووریا، بڕیاربوو سبەی هەینی مەزڵووم عەبدی بەسەرۆکایەتی شاندێک لە پاریس بێت و بەچاودێری سەرۆکی فەرەنسا و نێردەی ئەمریکا بۆ سووریا، لەگەڵ شاندی حکومەتی سووریا کۆببێتەوە کە دەوترا ئەسعەد شەیبانی، وەزیری دەرەوەی سووریا سەرۆکایەتی دەکات.

لێدوانی فەرمی: کەریم قەمەر، نوێنەری ئیدارەی خۆسەری باکوور و ڕۆژهەڵاتی سووریا لە فەڕەنسا بە ئاژانسی هاوارنیوزی ڕاگەیاندووە، کۆبوونەوەکەی نێوان شاندی ئیدارەی خۆسەری و دیمەشق بۆ کاتێکی نادیار دواخراوە، بەبێ ئەوەی هۆکاری دواخستنی دیدارەکە بخاتەڕوو.

سەبارەت بەوەی شاندەکەی ڕۆژئاوای کوردستان لەگەڵ بەرپرسانی فەڕەنساش کۆدەبنەوە یاخود نا، نوێنەری ئیدارەی خۆسەر وتویەتی، شاندەکە تائێستا نەگەیشتوونەتە پاریس.