بڕیاری ڕووخاندنی باڵەخانە سووتاوەکەی کوت دەدرێت

ئاڤا نیوز

ئەو باڵەخانە بازرگانییەی 17ـی ئەم مانگە لە پارێزگای واستی ناوەڕاستی عێراق ئاگری گرت و بەهۆیەوە دەیان کەس گیانیان لەدەستدا، شارەوانی کوت بڕیاری ڕووخاندنیدا بەهۆکاری ئەوەی بەکەڵکی نۆژەنکردنەوە نایەت و مەترسیش بۆ باڵەخانەکانی دەوروبەری دروستدەکات.

چیرۆکی سەرەکی: شەوی 16 لەسەر 17ـی ئەم مانگە لە شاری کوت لە پارێزگای واستی ناوەڕاستی عێراق، ئاگرێکی گەورە لە مۆڵێکی پێنج نهۆمی کەوتەوە ئەویش بەهۆی نەبوونی مەرجی تەندروستیی و سەلامەتی، بەهۆیەوە زیاتر لە 70 کەس گیانیان لەدەستدا و دەیان کەسی دیکەش برینداربوون، لەسەر ئەم ڕووداوەش پارێزگاری واست دەستی لەکارکێشایەوە و ژمارەیەک بەرپرسی پارێزگاکەش ڕەوانەی لیژنەی لێکۆڵینەوە کران.

ڕاگەیێنراوی فەرمی: سەرۆکایەتی شارەوانی کوت ئەمڕۆ شەممە بڵاویکردەوە، لەسەر بنەمای ڕاپۆرتی نووسینگەی ڕاوێژکاری ئەندازیاری لە زانکۆی واست، باڵەخانە سووتاوەکەی کوت کەڵکی نۆژەنکردنەوەی نەماوە و بۆ باڵەخانەکانی دەوروبەریشی مەترسیدارە.

زانیاریی زیاتر: سەرۆکایەتی شارەوانی کوت دەڵێت، کار بۆ تەواوکردنی ڕێکارە یاساییەکان دەکەین بۆ ڕووخاندنی باڵەخانە سووتاوەکە، داواش لە هاووڵاتیان دەکەین بۆ پاراستنی سەلامەتی گیانی خۆیان، نزیک شوێنی ڕووداوەکە نەکەونەوە.