سیستمی وزەی خۆر بۆ 25 قوتابخانەی دیکە لە کوردستان دادەنرێت

ئاڤا نیوز

وەزارەتی پەروەردەی حکومەتی هەرێمی کوردستان بە هاوکاری دەزگای خێرخوازی بارزانی و ڕێکخراوە نێودەوڵەتییەکان، بەردەوامە لە دانانی سیستمی وزەی خۆر بۆ قوتابخانەکان و 25 قوتابخانەی دیکە سوودمەند دەبن.

وێنە گەورەکە: بە فەرمانی سەرۆکوەزیران مەسرور بارزانی، تەواوی قوتابخانەکانی هەرێمی کوردستان سیستمی کارەبا بە وزەی خۆریان بۆ دابین دەکرێت. تا ئێستاش 95 قوتابخانە لە پارێزگاکانی هەولێر، سلێمانی، دهۆک، هەڵەبجە، کەرکووک و ئیدارە سەربەخۆکان، سیستەمەکەیان بۆ دانراوە.

لێدوانی فەرمی: ئالان حەمە سەعید، وەزیری پەروەردەی حکومەتی هەرێمی کوردستان بەئاڤای گوت، "بە هاوکاری دەزگای خێرخوازی بارزانی ئەمساڵ سیستمی وزەی خۆر لە 25 قوتابخانەی پارێزگاکانی هەولێر، دهۆک و هەڵەبجە دابین دەکرێت."

زانیاریی  زیاتر: بەگوتەی وەزیری پەروەردە، ساڵی ڕابردوو دەزگای خێرخوازی بارزانی سیستمی وزەی خۆری بۆ 10 قوتابخانە داناوە و بەو ژمارەیەی ئەمڕۆ دەبێتە 35 قوتابخانە، کۆی گشتیی ئەو قوتابخانانەی کە سیستمی وزە خۆریان دەبێت دەبن بە 120 قوتابخانە.