ئیسرائیل کوژرانی "پیاوی سێبەری حەماس" پشتڕاست دەکاتەوە

ئاڤا نیوز

سوپای ئیسرائیل پشتڕاستی دەکاتەوە مەڕوان عیسا، جێگری فەرماندەی باڵای حەماس ناسراو بە "کابووسی ئیسرائیل" دوو هەفتە لەمەوبەر لە بۆردوومانێکدا کوژراوە.

چیرۆکی سەرەکی: دوو هەفتە پێش ئێستا سوپای ئیسرائیل کوژرانی مەڕوان عیسای ڕاگەیاند، بەڵام  بزووتنەوەی حەماس ڕەتیکردەوە، ئێوارەی ئەمڕۆ جارێکی دیکە سوپای ئیسرائیل هەواڵی کوژرانی بڵاوكردەوە.

لێدوانی فەرمی: ئەڤیخای ئەدرەعی، گوتەبێژی سوپای ئیسرائیل دەڵێت: مەڕوان عیسا لەگەڵ فەرماندەیەکی دیکەی حەماس بە ناوی غازی ئەبو تەماع دوو هەفتە لەمەوپێش لە بۆردوومانێکدا كوژراوە.

بۆچوونی بەرامبەر: لەدوای قسەکانی ئەڤیخای ئەدرەعی تاوەکو ئامادەکردنی ئەم هەواڵە حەماس هیچی نەگوتووە.

ئەوەی پێویستە بیزانیت: مەڕوان عیسا بە یەکێک لە داڕێژەرانی پلانی هێرشەکەی 7ـی ئۆکتۆبەری حەماس بۆ سەر ئیسرائیل دادەنرێت،  پێشتریش لە چەندین هەوڵی کوشتن ڕزگاری ببوو.

ئەوەی لەبارەیەوە دەگوترا: حەماس نازناوی "کابووس ئیسرائیلی" لێنابوو، هاوکات فەڵەستنییەکان بە "پیاوی سێبەر" ناویان دەبرد، بەو پێیەی ڕادارەکانی ئیسرائیل نەیاندەتوانی بیدۆزنەوە.