پڕۆژەی ڕووناکی دەگاتە ئیدارەی سەربەخۆی سۆران

ئاڤا نیوز

کارەکانی پڕۆژەی ڕووناکی ڕۆژ بە ڕۆژ لە شار و ناوچە جیاوازەکانی هەرێمی کوردستان لە فراوانبوون دایە، بڕیارە لەماوەی سێ مانگی داهاتووشدا بگاتە سۆران. 

وێنە گەورەکە: پرۆژەی ڕووناکی یەکێکە لە پرۆژە ستراتیژەکانی حکومەتی هەرێمی کوردستان، مەبەست لێی دابینکردنی کارەبای 24 کاتژمێرییە بۆ هەرێمی کوردستان، بڕیارە تا کۆتایی ساڵی 2025 تەواوی سەنتەری شارەکان بگرێتەوە، هاوکات تاکۆتایی ساڵی 2026 تەواوی هەرێمی کوردستان دەبێتە خاوەن کارەبای 24 کاتژمێری، لەدوای شارەکان ئیدارە سەبەخۆکان و قەزا و ناحیەکان دەگرێتەوە.

لێدوانە فەرمییەکان: عەزیز ئەحمەد، جێگری بەڕێوەبەری نووسینگەی سەرۆكی حكومەتی هەرێمی كوردستان لە هەژماری تایبەتی خۆی لە تۆڕی كۆمەڵایەتی (ئێكس) بڵاوی كردەوە، ئیدارەی سۆران لە ماوەی کەمتر لە سێ مانگی داهاتوودا دەبێتە بەشێک لە پڕۆژەی ڕووناکی، کە پڕۆژەی حکومەتی هەرێمی کوردستانە بۆ دابینکردنی کارەبای 24 کاتژمێری.

ئێستا هاووڵاتییان لە سەنتەری شارەکانی هەولێر و سلێمانی و دهۆک، یەکەم هاوینیان بەبێ پچڕانی کارەبا بەڕێ دەکەن، ئەمەش 40%ـی تەواوی هاووڵاتییانی کوردستانە، لە ماوەیەکی نزیکیشدا دەگاتە سۆران.

ئەردەوان ئیبراهیم، بەڕێوەبەری کارەبای سۆران، بە ئاڤا میدیای ڕاگەیاند، ئامادەکاریمان دەستپێکردووە بۆ دەستپێکردنی پرۆژەی ڕووناکی لە ئیدارەی سەربەخۆی سۆران، لەوانەیە مانگی نۆ یان زیاتر بگاتە ئیدارەی سەربەخۆی سۆران.