هاکان فیدان لەگەڵ سەرکردەیەکی بزووتنەوەی حەماس دۆخی غەززە تاوتوێ دەکات

ئاڤا نیوز 

هاکان فیدان، وەزیری دەرەوەی تورکیا لە ئیستەنبووڵ پێشوازی لە محەممەد دەروێش، سەرۆکی ئەنجوومەنی شورای بزووتنەوەی حەماس و شاندی یاوەری کرد. لە کۆبوونەوەکەدا، دوایین پێشهاتەکانی غەززە و چۆنییەتی گەیاندنی هاوکارییەکان بە خەڵکی غەززە باس کرا.

زانیاریی بەدەستهاتوو: بەپێی سەرچاوەکانی وەزارەتی دەرەوەی تورکیا، هاکان فیدان لە کۆبوونەوەکەدا جەختی لەوە کردووەتەوە کە "ئەوەی ئێستا ئیسرائیل بە خەڵکی غەززە دەیکات، مەحکومکردنی خەڵکەکەیە بە برسێتی و سیاسەتی کۆمەڵکوژی بەکاردێنێت"، حکومەتەکەی نەتەنیاهۆ بە ئەنقەست دانوستانی ئاگربەست درێژدەکاتەوە تاوەکو بە سەختی لە خەڵکی غەززە بدات و ناچارییان بکات بەوەی خاک جێبێڵن.

لە بەشێکی دیکەی قسەکانیدا، فیدان پشتیووانی تورکیای بۆ ئاگربەست دووپات کردەوە و گوتی: بەهیچ شێوەیەک ڕێگەنادەین ئیسرائیل بەردەوام بێت لە کۆمەڵکوژی غەززە.

زانیاریی زیاتر: تورکیا ڕژدە لەسەر ئەوەی دۆسیەی فەلەستین بە جیهان بگەیێنێت و زۆر بە جددی تا کۆتایی پشتیووانی لە دۆسیەکە دەکات.