ئەنجوومەنی ئاسایش سەبارەت بە بارمتە ئیسرائیلییەکان کۆ دەبێتەوە

ئاڤا نیوز

ئەنجوومەنی ئاسایشی نەتەوە یەکگرتووەکان لەسەر برسییەتی بارمەتە ئیسرائیلییەکان کۆدەبێتەوە. 

لێدوانی فەرمی: دانی دانون، باڵیۆزی ئیسرائیل لە نەتەوە یەکگرتووەکان، ڕایگەیاند کۆبوونەوەی بەپەلەی ئەنجوومەنی ئاسایش ڕۆژی سێشەممە، 5-8-2025 بۆ بەدواداچوون بۆ دۆخی بارمتە ئیسرائیلییەکانی ژێر دەستی حەماس بەڕێوە دەچێت. 

لەلایەکی دیکەوە: ئەم کۆبوونەوەیە لە کاتێکدایە بە هۆی گەمارۆکانی ئیسرائیلەوە برسییەتی تەواوی کەرتەکەی گرتووەتەوە و بە هۆیەوە نزیکەی 160 فەلەستینی لە برسا مردوون، بەڵام کۆبوونەوەکەی ئەنجوومەنی ئاسایش لەسەر داوای ئیسرائیل و بۆ دۆخی برسییەتیی بارمتە ئیسرائیلییەکانە. 

ئەمەش بزانە: حەماس گرتەیەکی ڤیدیۆیی بڵاوکردەوە کە تیایدا دوو بارمتە ئیسرائیلی نیشان دەدرێت کە برسییەتی بە جەستەیانەوە دیارە. ئەمەش کاردانەوەی ئیسرائیلی بە دوای خۆیدا هێنا و بنیامین نەتانیاهۆ، سەرۆکوەزیرانی ئیسرائیل، داوای لە کۆمیتەی خاچی سووری نێودەوڵەتی کرد خواردن و دەرمان بگەیێنێتە بارمتە ئیسرائیلییەکان. 

زانیاریی زیاتر: حەماس ڕایگەیاندووە بارمتە ئیسرائیلییەکان لەو خواردنە دەخۆن کە چەکدارانی حەماس و خەڵکی غەززە دەیخۆن و هیچ تایبەتمەندییەکیان نییە. ئەوەشی گوتووە کە ئامانج لە بڵاوکردنەوەی ڤیدیۆکە ڕاکێشانی ڕای گشتییە بۆ قەیرانی مرۆیی غەززە کە هەمووانی گرتووەتەوە.