بەیرووت چاوەڕێی چەک داماڵینە و حزبوڵڵاش هێز نمایش دەکات

ئاڤا نیوز

لە کاتێکدا بڕیارە حکومەتی لوبنان، پرسی کۆکردنەوەی چەک لەلایەن دەوڵەتەوە یەکلایی بکاتەوە، لایەنگرانی حزبوڵڵاش چەندین نمایشی سەربازییان ئەنجامدا، ئەمەش کەشێکی پڕ لە دڵەڕاوکێ و ترسی لەنێوان لوبنانییەکان درووستکردووە.

چیرۆکی سەرەکی: لایەنگرانی حزبوڵڵا شەوی ڕابردوو لە چەندین ناوچەی لوبنان، بەتایبەتی بەیرووتی پایتەخت، کاروانی ماتۆڕسکیلیان ئەنجامدا، ئەمەش لەلایەن زۆرێک لە سیاسی و ڕۆژنامەنووسانەوە وەک پەیامێکی هەڕەشە و ئاگادارکردنەوە دژی بڕیاری ڕادەستکردنی چەکی حزبوڵڵا بە دەوڵەت لێکدرایەوە.

ڕاگەیێنراوی فەرمی: ڕۆژنامەنووس، تۆنی پۆڵس لە تویتێکدا لە پلاتفۆرمی ئێکس دەڵێت: پێش بەستنی دانیشتنە چاوەڕوانکراوەکەی ئەنجوومەنی وەزیران بۆ پەسەندکردنی میکانیزم و خشتەیەکی کاتی بۆ داماڵینی چەک، حزبوڵڵا خۆی بۆ کارێکی ئەمنیی مەترسیدار، داخستنی ڕێگاکان، دەرچوونی کاروانی ماتۆڕسکیل و وتنەوەی دروشمی تائیفی ئامادە دەکات.

لەلایەکی دیکەوە: فارس سەعید، سیاسەتمەدار و پەرلەمانتاری پێشووی لوبنان پێیوایە، ئامانجی ئەم ترس و تۆقاندنە میدیاییە دواخستنی دانیشتنی ئەنجوومەنی وەزیرانە بۆ یەکلاییکردنەوەی پرسی چەک و داماڵینی لە چەکدارانی حیزبوڵڵا.

ئەوەی پێویستە بیزانیت: ئەم کاروانانەی لایەنگرانی حزبوڵڵا دوای ئەوە دێت کە حیزبەکە ڕایگەیاند: گفتوگۆ لەسەر پرسی ڕادەستکردنی چەک ناکات و دەستبەرداری نابێت، تاوەکو ئیسرائیل لە باشووری لوبنان و ئەو پێنج خاڵەی تا ئێستا داگیری کردوون، نەکشێتەوە.