وتەبێژی وەزارەتی دەرەوەی ئەمریکا: پابەندین بە هاوبەشییەکەمان لەگەڵ هەسەدە

ئاڤا نیوز

وتەبێژی وەزارەتی دەرەوەی ئەمریکا ڕایدەگەیێنێت، وڵاتەکەی جەخت لە پابەندبوونی بە هاوبەشییەکەی لەگەڵ هێزەکانی سووریای دیموکرات (هەسەدە) دەکاتەوە، لە هەوڵەکانیدا بۆ بەرەنگاربوونەوەی چەکدارانی داعش.

لێدوانی ڕۆژنامەوانی: مایکل میچڵ، وتەبێژی وەزارەتی دەرەوەی ئەمریکا، لە چاوپێکەوتنێکیدا لەگەڵ ڕۆژنامەی "شەرق ئەلئەوسەت" داوای لە هەموو لایەن و هێزەکانی سووریا کرد دان بەخۆیاندا بگرن و خۆیان لە هەر ڕووبەڕووبوونەوەیەک بەدووربگرن کە سەقامگیریی باکووری ڕۆژهەڵاتی سووریا تێکدەدات.

لەهەمان کاتدا: میچڵ ئاماژەی بەوەشکرد، وڵاتەکەی زۆر نیگەرانە سەبارەت بە پەرەسەندنی تووندوتیژی لە سوەیدا، لەنێویشیاندا بەکارهێنانی هێز دژی ئەو هاووڵاتییە مەدەنیانەی کە مافی خۆیان لە دەربڕینی ئاشتیانەدا پەیڕەو کردووە.

زانیاریی زیاتر: بە گوتەی میچڵ، ئەمریکا بە نیگەرانییەوە چاودێریی ئەو پێکدادانانە دەکات کە لەم دواییانەدا لەنێوان هێزەکانی حکومەت و هەندێک گرووپی ناوخۆییدا ڕوویانداوە. حکومەتی ڕاگوزەر لە سووریا بەرپرسیارە لە پاراستنی هاووڵاتییانی مەدەنی و مسۆگەرکردنی مافەکانیان و داوای لێکرد لێپرسینەوە لەگەڵ ئەو کەسانەدا بکات کە یاسایان پێشێل کردووە، هاوکات خۆیان لە هەر پەرەسەندنێکی زیاتر بەدووربگرن.