بنەماڵەی کوژراوانی ڕووداوی بەنزینخانەکە گەیشتنە هەولێر

ئاڤا نیوز

بە مەبەستی لە نزیکەوە ئاگادار بوون لە ڕێککارەکانی لێکۆڵینەوە، پارێزگاری هەولێر پێشوازی لە بنەماڵەی كوژراوانی ڕووداوەكەی بەنزینخانەكە دەكات.

وێنە گەورەكە: كوشتنی دوو گەنجی خەڵكی بەغدا، بە دەستی كارمەندی بەنزینخانەیەكی شاری هەولێر، كاردانەوەی فراوانی لە تۆڕە كۆمەڵایەتییەكان لێ كەوتووەتەوە، بەمەبەستی بەلاڕێدانەچوونی كەیسەكە و دڵنیابوونەوە لەوەی مافی هیچ خاوەن مافێك نافەوتێت، كەسوكاری كوژراوان لەنزیكەوە لە ڕێكکارەكانی لێكۆڵینەوە ئاگادار دەكرێنەوە.

لێدوانی فەرمی: ئومێد خۆشناو، پارێزگاری هەولێر بە ئاڤای ڕاگەیاند، هاتنی كەسوكاری كوژراوەكانی بەنزینخانەكە، بە بانگهێشتنامەی فەرمیی ئێمە بووە، وەك دەربڕینی هاوخەمی بۆ ئەو كارەساتەی بەسەریان هاتووە، هاوكات بۆ دڵنیابوونەوەیانە لەوەی ڕێكکارەكانی لێكۆڵینەوە لە تاوانەكە، بەپێی یاسا بەڕێوەدەچێت و مافی كوژراوان نافەوتێت.


باكگراوند: ڕۆژی چوارشەممەی ڕابردوو 6ـی ئابی 2025، لە یەكێك لە بەنزینخانەكانی هەولێر، لەسەر پارەنەدان و ڕژاندنی بەنزین، شەڕ و دەمەقاڵێ لەنێوان دوو گەنجی بە ڕەچەڵەک عەرەب و یەكێك لە كارمەندانی بەنزینخانەكە دروستبوو، دواتر كارمەندەكە بە چەكی كلاشینكۆف دوو گەنجەكەی كوشت و هاووڵاتیەكی دیكەی خەڵكی هەولێریش كە لە دوورەوە وەستابوو و هیچ پەیوەندی بە كێشەكەوە نەبوو، فیشەكێكی بەركەوت و گیانی لەدەست دا، دوای ڕووداوەكە بكوژ دەستگیر كرا و پەڕاوی لێكۆڵینەوە لەسەر كەیسەكە كراوەتەوە.