ئەو کەسانەی هاوسەری بیانییان هەیە ناوی هاوسەرەکانیان لە پسوولەی خۆراک دەسڕێتەوە

ئاڤا نیوز

بەڕێوەبەری پسوولەی خۆراکی هەولێر ڕایدەگەیێنێت، ئەو کەسانەی هاوسەری بیانییان هەیە، ناوی هاوسەرەکانیان لە پسوولەی ئەلیکترۆنیی خۆراک تۆمار ناکرێت.

 

وێنە گەورەکە: زیاتر لە 83%ـی هاووڵاتیانی هەرچوار پارێزگاکەی هەرێمی کوردستان ناوی خۆیان لە پسوولەی ئەلیکترۆنیی خۆراک تۆمار کردووە، ئەوانەی خۆیان تۆمار نەکەن بەشەخۆراکیان دەبڕدرێت، جگە لەوەش ئەوانەی هاوسەری بیانییان هەیە، ناوی هاوسەرەکانیان دەسڕێتەوە.

 

لێدوانی فەرمی: سیامەند قادر نانەکەلی، بەڕێوەبەری پسوولەی ئەلیکترۆنیی خۆراکی هەولێر بە ئاڤای گوت، "پێشووتر ئەو کەسانەی هاوسەری ئەوروپی یان دەرەوەی عێراقیان هەیە، بە هەبوونی بەڵگەنامەی نیشتەجێبوون (ئیقامە) ناویان تۆمار دەکرا، بەڵام لە ساڵی 2018ـەوە، ئەمە وەستاوە و مەرجی تۆمارکردنی هەر کەسێک کارتی نیشتمانییە."

 

چارەسەر: ئەو کەسانەی هاوسەری بیانیان هەیە، دەبێت کارتی نیشتمانی بۆ دەربهێنن تاوەکو ناویان لە پسوولەی خۆراک تۆمار بکەن، بەپێچەوانەوە ناوی هاوسەرەکانیان لە پسوولەی خۆراک دەسڕێتەوە و بەشەخۆراکیان دەبڕدرێت.