زانکۆی سەڵاحەدین ئامادەکارییەکانی بۆ ساڵی نوێی خوێندن دەستپێدەکات

ئاڤا نیوز

بۆ پێشوازیکردن لە ساڵی نوێی خوێندنی 2025-2026، زانکۆی سەڵاحەدین ئامادەکارییەکانی بۆ پرۆسەی خوێندن دەستپێدەکات.

چیرۆکی سەرەکی: بڕیارە 2025-09-07، ساڵی نوێی خوێندن لە زانکۆی سەڵاحەدین دەستپێبکات، بۆ ئەم مەبەستەش سەرۆکایەتی زانکۆ و کۆلێژ و بەشەکان ڕاسپێردراون، تا ئامادەکارییەکانیان دەستپێبکەن.

لێدوانی فەرمی: سامان عەبدوڵڵا، بەڕێوەبەری ڕاگەیاندنی زانکۆی سەڵاحەدین بە ئاڤا میدیای ڕاگەیاند: ڕۆژی 2025-09-01، مامۆستایان و تۆمارکردنی مۆدڵەکانی خوێندن و وەرگرتنی مامەڵەی بەشەناوخۆیی شەهید شەوکەتی کوڕان و 18ـی شوباتی کچان دەستبەکاردەبن.

لەلایەکی دیکەوە: بەڕێوەبەری تۆماری گشتی ڕاسپێردراوە، بۆ ئەوەی هەماهەنگی تەواو لەگەڵ سەرجەم تۆمارەکان بکات، تا ڕێکارەکانی خۆتۆمارکردن بۆ بەشەناوخۆییەکان ئامادە بکرێت. هاوکات ڕاگری سەرجەم کۆلێژەکان و سەرۆک بەشەکان بۆ پێشوازی و هاتنەوەی قوتابیان ڕاسپێردراون.

سەرۆکایەتی زانکۆی سەڵاحەدین تیمەکانی ڕاسپاردووە، بۆ ئەوەی لە ڕۆژی 2025-08-25 بەشە ناوخۆییەکان پاکبکرێنەوە ئامادە بکرێن.