كۆمپانیا و خاوەنكارانی هەرێمی كوردستان بانگهێشتی ئەڵمانیا دەكرێن

ئاڤا نیوز

بە مەبەستی بەشداریكردن لە پێشانگەی نێودەوڵەتیی كەلوپەلی فڕۆكەخانەكان كە لە شاری میونشن دەكرێتەوە، كۆمپانیا و خاوەنكارانی هەرێمی كوردستان بانگهێشتی ئەڵمانیا دەكرێن.

چیرۆكی سەرەكی: لە ڕۆژانی 7 تاوەكو 9ـی ئۆكتۆبەری ئەمساڵ، لە شاری میونخ لە وڵاتی ئەڵمانیا، پێشەنگای نێودەوڵەتیی بۆ دامەزراندنی فڕۆكەخانە و نمایشكردنی كەلوپەلی نێو فڕۆكەخانەكان دەكرێتەوە، ژووری بازرگانی و پیشەسازیی هەولێر داوا لە كۆمپانیا و خاوەنكارەكانی هەرێمی كوردستان دەكات، ئەوانەی خواستی بەشداریكردنیان هەیە، لە نزیكترین كاتدا زانیاریی پێویست لەبارەی پێشەنگاكە وەربگرن.

لێدوانی فەرمی: كامەران سەڵاح باجگر، سەرۆكی ژووری بازرگانی و پیشەسازیی هەولێر، لەڕێگەی ئاڤاوە خوازیاران ئاگادار دەكاتەوە كە بۆ وەرگرتنی زانیاریی لەبارەی بەشداریكردن لەو پێشەنگایە، سەردانی بەشی پەیوەندییەكانی ژووری بازرگانی و پیشەسازی بكەن.

سەرۆكی ژووری بازرگانی و پیشەسازیی هەولێر ڕوونیشی كردەوە، لەلایەن وەزارەتی بازرگانیی عێراق و ژووری یەكێتییە بازرگانییەكانی عێراق بە نووسراوی فەرمی ئاگادار كراینەوە بەوەی، كۆمپانیا و خاوەنكارانی هەرێمی كوردستان دەتوانن داواكاریی بۆ بەشداریكردن لەو فێستیڤاڵە پێشكەش بكەن، ژووری بازرگانی و پیشەسازیی هەولێر هەموو كارئاسانییەك دەكات بۆ بازرگانان و خاوەن كۆمپانیاكان بۆ ئەم گەشتە.

ئەوەی پێویستە بیزانیت: بەشێكی زۆری تێچووی گەشت و بەشداریكردن لە فێستیڤاڵی كەلوپەلی فڕۆكەخانەكان لە میونشن، لە ئەستۆی ڕێكخەرانی پێشانگەكەیە.