سوودانی: پارتی ڕۆڵێکی بنەڕەتی لە ڕووخاندنی دیکتاتۆرییەت و بوونیادنانی عێراقی نوێدا هەبووە

ئاڤا نیوز

سەرۆک وەزیرانی عێراق، لە پەیامێکدا پیرۆزبایی 79ـەمین ساڵیادی دامەزراندنی پارتی دیموکراتی کوردستانی ئاراستەی سەرۆک بارزانی کرد و ستایشی ڕۆڵی مێژوویی پارتەکەی کرد.

چیرۆکی سەرەکی: ئەمڕۆ 16ـی ئابی 2025، پارتی دیموكراتی كوردستان مۆمی 79ـەمین ساڵەی دامەزراندنی دادەگیرسێنێت، لە ناوچە جیا جیاكانی هەرێمی كوردستان بەم بۆنەوە، مەراسیم و چالاكی جۆراوجۆر ئەنجام دەدرێت و بۆ یادی دامەزراندنی گەورەترین حیزبی كوردستان ئاهەنگ دەگێڕدرێت. هاوکات زۆرینەی کەسایەتی و سەرکردە سیاسییەکان پەیامی پیرۆزباییان ئاراستە کردووە. 

لێدوانی فەرمی: محەممەد شیاع سوودانی، سەرۆک وەزیرانی عێراق لە بروسکەی پیرۆزباییەکەیدا، ئاماژەی بە مێژووی تێکۆشانی پارتی و ڕۆڵی بنەڕەتیی کردووە، شانبەشانی هێز و لایەنە نیشتمانییەکانی دیکە، لە ڕووبەڕووبوونەوەی دیکتاتۆرییەت و بەشداریکردن لە بوونیادنانی عێراقی نوێی دیموکراتیدا.

هەروەها سوودانی جەختی لە گرنگیی بەردەوامیی هەوڵەکان کردەوە بۆ پارێزگاریکردن لەو دەستکەوتانەی کە بۆ هەموو ڕۆڵەکانی گەلی عێراق بەدەستهاتوون.