کۆریای باکوور دوو مووشەکی نوێی بەرگریی ئاسمانی تاقیدەکاتەوە

ئاڤا نیوز

لە سەروبەندی دیداری دۆناڵد ترەمپ، سەرۆکی ئەمریکا لەگەڵ سەرۆکی کۆریای باشوور، کۆریای باکوور هەڵدەستێت بە تاقیکردنەوەی مووشەکی نوێ، ڕاپۆرتەکانی وڵاتەکەش دەریدەخەن ، دوو مووشەکەکە توانای باش و بەهێزیان هەیە.

زانیاریی بەدەستهاتوو: ئاژانسی هەواڵی دەوڵەتی کۆریای باکوور (KCNA)لە ڕاپۆرتێکدا ڕایگەیاند،''کیم جۆنگ ئون، سەرۆکی کۆریای باکوور سەرپەرشتیی هەڵدانی مووشەکی نوێی بەرگریی ئاسمانی کردووە بۆ ئەوەی ئاستی توانا سەربازیی وڵاتەکە تاقیبکاتەوە، ڕاپۆرتەکە دەشڵێت، بەپێی هەڵسەنگاندنی هەردوو مووشەک  گونجاون بۆ لەناوبردنی ئامانجە ئاسمانییە جیاوازەکان".

ئەوەی پێویستە بیزانیت:ئەم پێشهاتە لەکاتێکدایە، کۆبوونەوەی لووتکەی نێوان سەرۆکی ئەمریکا  سەرۆکی کۆریای باشوور، بڕیارە سبەی 25ی ئابدا بەڕێوەبچێت و ترەمپ لە کۆشکی سپی پێشوازی لە سەرۆکی نوێی کۆریای باشوور لی جای میونگ دەکات.

زانیاریی زیاتر: ڕۆژی هەینی، سەرۆکی کۆریای باشوور، لی جای میونگ بەڵێنیداوە متمانە لەگەڵ کۆریای باکوور دروست بکات و ڕێککەوتنی سەربازی بۆ کەمکردنەوەی گرژییە سنوورییەکانی نێوان هەردوو وڵات بگرێتەبەر، سەرەڕای ئەوەی پیۆنگ یانگ بەئاشکرا وتوویەتی ئامادە نییە پەیوەندییەکانی لەگەڵ سیئۆل باشتر بکات.