دامەزارندنی مامۆستایانی وانەبێژی پاشکۆ کێشەی تێدەکەوێت

ئاڤا نیوز

 

ژمارەیەک وانەبێژی پاشکۆی سەر بە وەزارەتی خوێندنی باڵا کە شایستەی ئەوەن بکرێن بە گرێبەست، چەند ساڵێکە لە زانکۆ و پەیمانگەکان وانە دەڵێنەوە، ماوەیەکی زۆرە چاوەڕێی بەگرێبەستکردنیان دەکەن، بەڵام مامەڵەکانیان وەستاوە و بەگرێبەستکردنیان پەیوەستە بە بڕیاری ئەنجوومەنی وەزیرانەوە.

 

وێنە گەورەکە: مانگی 10ی ساڵی ڕابردوو بڕیاری دامەزراندن بە گرێبەست بۆ وانەبێژانی سەربە خوێندنی باڵا دەرکرا و چوار هەزار و  100 مامۆستا دامەزران، بەشێکی ئەو مامۆستایانەی شایستەن، نەکران بەگرێبەست،  دواتر وەزارەتی خوێندنی باڵا هەموویانی کرد بەیەک لیست و ناوی هەزار و 600 وانەبێژی دیکەی بۆ دامەزراندن ڕادەستی ئەنجوومەنی ڕاژە کرد.

 

لێدوانی فەرمی: د. توانا نەجەف، بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا و توێژینەوەی زانستیی کوردستان بە ئاڤای گوت، "ناوی مامۆستایانی پاشکۆمان ڕەوانەی ئەنجوومەنی ڕاژە کردووە و فەرمانی بەگرێبەستکردنیان پەیوەستە بە ئەنجوومەنی وەزیران."

 

بۆچوونی لایەنی بەرامبەر: سەرچاوەیەک لە ئەنجوومەنی ڕاژەی گشتیی هەرێمی کوردستان بە ئاڤای گوت، "وردبینیمان لە لیستی مامۆستایانی پاشکۆ دەستپێنەکردووە، چونکە دەبێت فەرمانی ئەنجوومەنی وەزیران هەبێت، بۆ ئەوەی وردبینی لە داتا و زانیارییەکانیان بکەین."