سوودانی پێشوازی لە پەسندکردنی ناوی باڵیۆزە نوێیەکان دەکات

ئاڤا نیوز

سەرۆکوەزیرانی عێراق، پێشوازی لە هەنگاوی پەرلەمانی عێراق دەکات بۆ دەنگدان لەسەر لیستی باڵیۆزە نوێیەکان و ئەم هەنگاوەش بە بەشێک لە چاکسازیی ئیداریی حکومەتەکەی ناودەبات.

چیرۆکی سەرەکی: پەرلەمانی عێراق لە کۆبوونەوەی ڕۆژی سێشەممەیدا لیستی 93 کاندیدی بۆ پۆستی باڵیۆزی نوێی عێراق لە وڵاتانی جیهان پەسەند کرد، لەو ژمارەیەش 18 باڵیۆزیان کوردن و لەناو کوریشدا 10 باڵیۆزیان پارتی و 8ـەکەی دیکەش سەر بە یەکێتین.

ڕاگەیێنراوی فەرمی: لە ڕاگەیێنراوێکدا کە لەلایەن نووسینگەی ڕاگەیاندنەکەیەوە بڵاوکرایەوە، محەممەد شیاع سوودانی، سەرۆکوەزیرانی عێراق ستایشی ڕۆحی هاوکاریی سەرۆکایەتیی پەرلەمان، لیژنەی پەیوەندییەکانی دەرەوە و هێزە سیاسییەکانی کرد بۆ یەکلاییکردنەوەی ئەم دۆسیەیە کە لە ساڵی 2009ـەوە هەڵپەسێردرابوو.

- سەرۆکوەزیران جەختی لەوەش کردەوە، پێویستە باڵیۆزە نوێیەکان ئەرکەکانیان بە باشترین شێوە جێبەجێ بکەن لە نوێنەرایەتیکردنی عێراق لە دەرەوە، پاراستنی بەرژەوەندییەکانی وڵات و چاودێریکردنی ڕەوەندی عێراقی لەو وڵاتانەی کاری تێدا دەکەن.

- لە کۆتایی ڕاگەیێنراوەکە هاتووە، "بێگومان ئەمە توانای دامەزراوەی دیپلۆماسی بەهێزتر دەکات بۆ جێبەجێکردنی ڕۆڵی خۆی و خزمەتکردنی بەرژەوەندییە گشتییەکانی گەلی عێراق."