زیاتر لە 210 هەزار کەس ئەپی 'KRDpass'ـیان لەناو مۆبایل دابەزاندووە

ئاڤا نیوز

ئەپڵیکەیشنی KRDpass تا دێت زیاتر پێشدەکەوێت و ڕۆژانە هەزاران کەس ئەپەکە لەناو مۆبایل دادەبەزێنن. تا دوێنێ 210 هەزار کەس ئەپڵیکەیشنەکەیان دابەزاندووە.

وێنە گەورەكە: حکومەتی هەرێمی کوردستان لەڕێگەی فەرمانگەی تەکنەلۆژیای زانیاری، پڕۆژەیەکی ستراتیژی و گەورەی بەناوی "KRD Pass" دامەزراندووە كە ئەپڵیکەیشنێکی زیرەک لەخۆدەگرێت و وەک جزدانێکی ئەلیکترۆنی کاردەکات؛ بە ئامانجی کۆتاییهێنان بە ڕۆتیناتی فەرمانگەکان و هەڵگرتنی جزدانێكی قورس و پڕ لە كاغەز و بەڵگەنامە، بەجێگەی ئەوە؛ دانانی سەرجەم خزمەتگوزارییە حکومییەکان بەشێوەی ئۆنڵاین.

لێدوانی فەرمی: هیوا ئەفەندی، سەرۆکی فەرمانگەی تەکنۆلۆژیای زانیاریی حکومەتی هەرێمی کوردستان بە ئاڤای ڕاگەیاند، ئەپڵیکەیشنەکە ڕۆژ دوای ڕۆژ خزمەتگوزارییەکانی زیاتر دەبن. تا دوو هەفتەی تر هەر لەسەر ئەو ئەپە دەتوانی بزانی سەیارەکەت چەند سزای لەسەرە.

- تا کۆتایی مانگی نۆ خزمەتگوزاریەکی دیکە زیاد دەبێت، هەر لەسەر ئەو ئەپڵیکەیشنە دەتوانی بزانی لە پڕۆژەی ڕووناکی چەندت بۆ هاتووەتەوە، چەند کارەبات خەرج کردووە.

- لە مانگی 10 دەتوانی هەر لەو ئەپڵیکەیشنە پارە بدەی. واتا پێویست ناکات سەردانی بەڕێوەبەرایەتیی هاتووچۆ بکەیت، بۆئەوەی پێبژاردنی ئۆتۆمبێلەکەت بدەی، هەر لە ماڵەوە دەتوانی بە ئەپڵیکەیشنی کەی ئار دی پاس  پارە بدەی.

سەبارەت بە خۆ تۆمارکردن لە ئەپەکەدا، هیوا ئەفەندی دەڵێت، کاتێک ئەپەکە دادەبەزێنیت، داوای پێناسی دیجیتاڵیت لێ دەکات، ئەگەر نەتبوو 26 بانک دیاریکراوە و دەتوانی سەردانیان بکەیت و لەوێ بە کەمترین کات پێناسی دیجیتاڵیت بۆ دروست دەکەن. ئێستا دوو ملیۆن و 100 هەزار کەس پێناسی دیجیتاڵییان هەیە.

هیوا ئەفەندی ئاماژە بەوە دەکات، هەر لەم ماوەیەدا بۆ ناونوسینی حەج و عومرە، 60 هەزار کەس بە پێناسی دیجیتاڵی خۆیان تۆمار کرد، بەبێ ئەوەی بچن سەرە بگرن تاوەکو فۆرم وەربگرن.

بۆچی گرنگە: ئەپلیکەیشنی KRDpass، یەکێکە لە خزمەتگوزارییە گرنگەکان هەموو زانیارییەکانی تۆ لەناو مۆبایلەکەت دەبێت، بۆ نمونە پێویست ناکات تۆ ئەو هەموو ناسنامەیە هەڵبگریت. هاوکات، هەر لەسەر ئەو ئەپڵیکەیشنە دەزانی مووچەی ئەم مانگەت چەندە، چەندی بنەڕەتییە، چەندت لێ بڕاوە و ئەو لێ بڕينە هی چییە.

ئەمەش بزانە: ئەم ئیشە ناوازەیە تەنیا لە حکومەتە پێشکەوتووەکان هەیە، بۆ نموونە حکومەتی ئیمارات ئەپێکی هەیە بەناوی (یو ئەی ئی پاس). هەروەها حکومەتی سینگاپۆرە ئەپێکی هەیە بەناوی (سینگ پاس)
هەموو وڵاتانی پێشکەوتوو ئەم ئەپەیان هەیە.