ڕووسیا سیستەمی GPSـی یەکێتی ئەوروپا پەک دەخات

ئاڤا نیوز

لەدوای دەستپێکردنی جەنگ لەگەڵ ئۆکراینا، ڕووسیا پەرەی بە چەکێکی پێشکەوتوو داوە کە سیستمی GPS لە ئەوروپا لەکار دەخات.

چیرۆکی سەرەکی: لەدوای دەستپێکردنی هێرشی ڕووسیا بۆ سەر ئۆکرانیا لە ساڵی 2022، ڕووسیا چەکێکی پێشکەوتووی بەکارهێناوە بۆ پەکخستنی سیستەمی GPS لە ئەوروپا، کە بەهۆیەوە بەرپرسانی ئەوروپی تووشی کێشە بوونەتەوە لە نیشتنەوەی فڕۆکەکانیان.

زانیاریی زیاتر: پەکخستنی سیستەمی GPS، فڕۆکەکەی ئۆرسولا ڤۆن دێر لاین، سەرۆکی کۆمیسیۆنی یەکێتی ئەوروپای گرتەوە، کاتێک لە ئاسمانی بولگاریا ناچار بوو بە بەکارهێنانی نەخشەی کاغەز بنیشێتەوە. وتەبێژی کۆمیسیۆنی یەکێتی ئەوروپا لەدوای ڕووداوەکە ڕایگەیاند، کە پێویستە پرسیار لە ڕووسیا بکرێت لەبارەی ئەم بابەتەوە.

ئەوەی پێویستە بیزانیت: ڕووسیا و ئۆکرانیا چەندین جۆری چەکی ئەلیکترۆنی بەکاردەهێنن بۆ پەکخستنی درۆن و مووشەکەکانی یەکتری. ڕۆژنامەی فاینەنشیاڵ تایمز ئاشکرای کردووە کە ڕووسیا چەندین سیستەمی پەکخستنی GPSـی هەیە و زۆرێک لەو مووشەکانەی ئەمریکا بە ئۆکرانیای داوە و پشت بە سیستەمی GPS دەبەستن، لەلایەن ڕووسیاوە پەکخراون.