میدیاکانی ئیسرائیل: ئەم هەفتەیە دوو وەزیری سووریا و ئیسرائیل کۆدەبنەوە

ئاڤا نیوز

دەستەی پەخشی ئیسرائیل ئاشکرای کردووە، بڕیارە ئەم هەفتەیە وەزیری دەرەوەی سووریا و وەزیری کاروباری ستراتیژی ئیسرائیل کۆببنەوە.

وێنە گەورەکە: بەرپرسانی سووریا و ئیسرائیل بە نێوەندگیری ئەمریکا دانوستان دەکەن بۆ کەمکردنەوەی ڕووبەڕووبوونەوە و گرژییەکان لە باشووری سووریا. خولی پێشووی دانوستانەکان لە کۆتایی مانگی تەمموزدا لە پاریس بەڕێوەچوو، بەڵام بەبێ ڕێککەوتنی کۆتایی کۆتاییهات.

ڕاگەیێنراوی فەرمی: دەستەی پەخشی ئیسرائیل دەڵێت: بڕیارە ئەم هەفتەیە ئەسعەد شەیبانی، وەزیری دەرەوەی سووریا و ڕۆن دێرمەر، وەزیری کاروباری ستراتیژیی ئیسرائیل کۆببنەوە. دێرمەر پێشتر چەند جارێک لەگەڵ شەیبانی کۆبووەتەوە بۆ ئەوەی ڕێگە خۆشبکات بۆ ڕێککەوتنی ئەمنی نێوان ئیسرائیل و سووریا. تۆم باراک، نێردەی ئەمریکا بۆ سووریا و لوبنان، پاڵپشتیی ئەم کۆبوونەوانە دەکات.

هۆکارە زانراوەکان: کۆبوونەوەکانی بەرپرسانی ئەو دوو وڵاتە لە دوای ئەو تووندوتیژییانە دێت کە لە 13ـی تەمموزدا لە پارێزگای سوەیدای زۆرینە درووزینشین ڕوویاندا. بەهۆی هێرشی خێڵە بەدەوییەکان و چەکدارانی حکومەت سەدان کەسی درووزی کوژران و بریندار بوون.

کاریگەری و لێککەوتەکان: دواتر ئیسرائیل دەستوەردانی کرد و هێرشی ئاسمانی بۆ پاڵپشتیکردنی درووزەکان دژی هێزەکانی حکومەت و چەکداری خێڵە عەرەبییەکان ئەنجامدا، دواتر واشنتن ڕێککەوتنی ئاگربەست لە نێوان دیمەشق و تەلئەبیب لە 19ـی هەمان مانگ ڕاگەیاند.