میدیای قەتەر: سەرکردەکانی حەماس بەسەرۆکایەتیی خەلیل حەییە ڕزگاریان بووە

ئاڤا نیوز

 

کەناڵی (جەزیرە)ی قەتەری لە زاری سەرچاوەیەکی حەماسەوە بڵاویکردەوە، لە هێرشەکەی ئەمڕۆی ئیسرائیل بۆ سەر بارەگای سەرکردەکانی حەماس لە دەوحەی پایتەختی قەتەر، سەرکردەکانی حەماس بەسەرۆکایەتیی خەلیل حەییە، جێگری سەرۆکی مەکتەبی سیاسی بزووتنەوەکە ڕزگاریان بووە.

 

وێنە گەورەکە: ئەمڕۆ سێشەممە ئیسرائیل لەڕێگەی فڕۆکەی جەنگییەوە ژمارەیەک بارەگای سەرکردەکانی حەماسی لە دەوحەی پایتەختی قەتەر کردە ئامانج، لە هێرشەکاندا کۆبوونەوەیەکی سەرکردایەتی حەماسیش کراوەتە ئامانج، سەرەتا میدیای ئیسرائیل کوژرانی هەریەکە لە خەلیل حەییە، زاهیر جەبار، خالید مەشعەل و نزار عەوەزەڵای بڵاوکرەوە کە دیارترین سەرکردەکانی حەماسن لە دەرەوە.

 

زانیاریی بەدەستهاتوو: سەرچاوەیەکی باڵای بزووتنەوەی حەماس بە کەناڵی جەزیرەی قەتەری ڕاگەیاند، هێرشەکەی ئیسرائیل کۆبوونەوەیەکی سەرکردەکانی حەماسی لە دەوحە کردووەتە ئامانج، شاندی سەرکردەکانی حەماسیش بەسەرۆکایەتیی خەلیل حەییە، جێگری سەرۆکی مەکتەبی سیاسی بزووتنەوەکە لە هێرشەکە ڕزگاریان بووە.

 

ئاماژەی بەوەشکردووە، سەرکردەکانی حەماس کاتێک کراونەتە ئامانج کە لە کۆبوونەوەدابوون بۆ تاوتوێ کردنی پێشنیازەکەی دۆناڵد ترەمپ، سەرۆکی ئەمریکا کە پەیوەست بووە بە ڕاگەیاندنی ئاگربەست لە غەززە.