عێراق بە تووندی سەرکۆنەی هێرشەکەی ئیسرائیل بۆ سەر سەرکردەکانی حەماس لە دەوحە دەکات

ئاڤا نیوز

وەزارەتی دەرەوەی عێراق، بە تووندی سەرکۆنەی هێرشەکەی ئیسرائیل دەکات بۆ سەر سەرکردەکانی بزووتنەوەی حەماس لە دەوحەی پایتەختی قەتەر و ئەم کارە بە "کردەوەیەکی ترسنۆکانە" دادەنێت کە "پێشێلکردنێکی ئاشکرای سەروەری و خاکی دەوڵەتی قەتەری برایە" و "هەڕەشەیەکیشە بۆ سەر ئاسایش و سەقامگیرییەکەی".

 

چیرۆکی سەرەکی: ئەمڕۆ سێشەممە ئیسرائیل لەڕێگەی فڕۆکەی جەنگییەوە ژمارەیەک بارەگای سەرکردەکانی حەماسی لە دەوحەی پایتەختی قەتەر کردە ئامانج، لە هێرشەکاندا کۆبوونەوەیەکی سەرکردایەتیی حەماسیش کراوەتە ئامانج.

 

ڕاگەیێنراوی فەرمی: عێراق جەخت لەوە دەکاتەوە ئەم هێرشە لە درێژەی سیاسەتی کوشتن و ئاوارەکردنی سیستماتیکی ئیسرائیل دێت دژی گەلی فەلەستین، کە "ئاسایش و ئاشتی ناوچەیی و نێودەوڵەتی ڕووبەڕووی پەرەسەندن و گرژی زیاتر دەکاتەوە."

 

- لەم چوارچێوەیەدا، وەزارەتی دەرەوە دووپاتی هەڵوێستی نەگۆڕی عێراق دەکاتەوە لە پاڵپشتیکردنی حکومەت و گەلی دەوڵەتی قەتەری برا و پشتگیری تەواوی خۆی دەردەبڕێت لە ڕووبەڕووبوونەوەی هەر هێرشێک کە سەروەرییەکەی پێشێل بکات یان ئاسایشی نیشتمانییەکەی بخاتە مەترسییەوە.

 

- هاوکات وەزارەتەکە جەخت لەسەر پێویستیی وەرگرتنی بەرپرسیارێتیی کۆمەڵگەی نێودەوڵەتی دەکاتەوە بۆ کۆتاییهێنان بەم جۆرە کردەوە دوژمنکارییانە.