تورکیا چۆن بەرپرسانی باڵای حەماسی لە هێرشەکەی ئیسرائیل بۆ سەر دەوحە ڕزگار کرد؟

ئاڤا نیوز

بەپێی ڕاپۆرتێکی ڕۆژنامەیەکی ئەمریکی، دەزگای هەواڵگری تورکیا (میت) توانیویەتی بەرپرسە باڵاکانی حەماس لە هێرشێکی مووشەکی ئیسرائیلدا لە دەوحەی پایتەختی قەتەر ڕزگار بکات. 

چیرۆکی سەرەکی: دوێنێ سێشەممە، ئیسرائیل هێرشی کردە سەر بارەگای شاندی دانوستانکاری بزووتنەوەی حەماس لە دەوحەی پایتەختی قەتەر، سەرەڕای ڕزگاربوونی سەرکردەکانی حەماس، بەڵام کوڕی خەلیل ئەلحەیە، سەرۆکی شاندەکە و چەند کەسێکی دیکە گیانیان لەدەستدا.

زانیاریی بەدەستهاتوو: رۆژنامەی وۆڵ ستریت جۆرناڵی ئەمریکی ئاماژەی بەوەداوە کە نزیکەی 10 فڕۆکەی جەنگی ئیسرائیل بەشدارییان لە هێرشەکەدا کردووە، کە هەریەکەیان مووشەکێکی ئاراستەی ئەو شوێنە کردووە کە بەرپرسانی حەماسی تێدا بووە. سەرەڕای ئەوەی دووری نێوان دەوحە و تەلئەبیب زیاتر لە 1600 کیلۆمەترە، بەڵام توانای فڕۆکە ئیسرائیلییەکان بۆ هێرشکردن لە دوورەوە وایکردووە کە زانیاری ورد لەسەر ئاسمانی ئەو وڵاتەی فڕۆکەکان لێوەی هێرشەکەیان ئەنجامداوە، نەزانرێت.

لەلایەکی دیکەوە: سەرچاوەکانی هەواڵ ئاماژەیان بەوەداوە کە چەند مانگێک پێش ئێستا، هەردوو دەزگای هەواڵگری میسر و تورکیا گومانیان هەبووە کە ئیسرائیل پلانی هێرشکردنە سەر شاندی دانوستانکاری حەماسی هەیە. هەرچەندە وردەکارییەکانی پلانەکەیان نەزانیوە، بەڵام هۆشدارییان داوەتە شاندەکە بۆ ئەوەی ئاگاداری خۆیان بن.

چی ڕوویدا: لە کاتی هێرشەکەدا، دەزگای هەواڵگری تورکیا هەستی بە جموجۆڵی نائاسایی فڕۆکە ئیسرائیلییەکان کردووە و زوو پەیوەندی بە سەرکردەکانی حەماسەوە لە دەوحە کردووە. میت هۆشداری پێداون کە شوێنەکانیان بە پەلە چۆڵ بکەن، چونکە ئیسرائیل هێرش دەکاتە سەریان.

بەهۆی ئەم هۆشدارییە خێرایەوە، سەرکردەکانی حەماس توانیویانە بەپەلە شوێنەکانیان چۆڵ بکەن و ژیانیان ڕزگار بکەن. بەڵام بەشێک لە پاسەوانەکانیان و منداڵەکانیان نەگەیشتوونەتە دەرەوە و لە هێرشەکەدا گیانیان لەدەستداوە.

زانیاریی زیاتر: دوای ڕووداوەکە، دەزگای هەواڵگری تورکیا دەستبەجێ بەشێک لە شاندی حەماسی گواستووەتەوە بۆ تورکیا، بەمەش جارێکی تر ڕۆڵی خۆی وەک یەکێک لە ئەکتەرە سەرەکییەکانی کێشەکەدا دووپات کردەوە.