بەرگریی ئیسرائیل: غەززە دەسووتێت

ئاڤا نیوز

ئۆپەراسیۆنەکانی ئیسرائیل لەکەرتی غەززە بەردەوامە ئەمڕۆ لەماوەیەکی کەمدا بۆردومانی تووندی شاری غەززەی کردووە و وەزیری بەرگریی ئیسرائیلیش دەڵێت: غەززە دەسووتێت.

وێنە گەورەکە: شەڕی غەززە بەردەوامە، ئەمریکا کاردەکات بۆئەوەی ئاگربەست بۆ غەززە ڕابگەیێنێت و سەرۆکی ئەمریکا، هۆشداریی بە بزووتنەوەی حەماس داوە و هاوکات مارکۆ ڕوبیۆ، وەزیری دەرەوەی وڵاتەکەی ناردە ئیسرائیل بۆ تاتوێیکردنی پرسی غەززە لەگەڵ بنیامین نەتانیاهۆ سەرۆکوەزیرانی ئیسرائیل دواجاریش ڕۆبیۆ دووپاتیکردەوە، حەماس ماوەیەکی زۆر کورتی لەبەردەست دایە بۆ ڕازیبوون بە ئاگربەست.

لێدوانی فەرمی: یسرائیل کاتز، وەزیری بەرگریی ئیسرائیل ڕایگەیاند، غەززە دەسووتێت، سوپای وڵاتەکە بەردەوام دەبێت بۆ شکستپێهێنانی بزووتنەوەی حەماس و ئازادکردنی سەرجەم بارمتەکان، هاوکات دووپاتیدەکاتەوە ئیسرائیل پاشەکشە ناکات تا ئەو کاتەی ئەرکەکەیان لە غەززە تەواو نەبێت و گورزی تووند لە ژێرخانی حەماس دەدات''.

 
کاریگەری و لێکەوتەکان: ئەمەش لە کاتێکدایە ئیسرائیل ئەمڕۆ سێشەممە لە ماوەی تەنیا 20 خولەکدا 37 هێرشی ئاسمانی بۆ سەر شاری غەززە ئەنجامداوە، نزیکەی 50 کەس بەهۆی بۆردومانەکانەوە گیانی لەدەستداوە.