کەتائیبی قەسام "وێنەیەکی ماڵئاوایی" بارمتەکانی ئیسرائیل بڵاودەکاتەوە و هۆشداری دەدات لە چارەنووسیان

ئاڤا نیوز

کەتائیبی قەسام، باڵی سەربازی بزووتنەوەی حەماس، وێنەی 46 بارمتەی ئیسرائیلی کە لەلای ماون لە کەرتی غەززە، بڵاوکردەوە و ناوی هەموویان بە "ڕۆن ئاراد" ناودێر کردووە.

ئەوەی پێویستە بیزانیت: ڕۆن ئاراد، فڕۆکەوانێکی هێزی ئاسمانی ئیسرائیل بوو کە فڕۆکەکەی لە ساڵی 1986 لە لوبنان کەوتە خوارەوە و لە ساڵی 1988ـەوە وەک بێسەروشوێن ناسێنراوە، بەو مانایەی کە ڕەنگە ئەوانیش تووشی هەمان چارەنووس ببنەوە.

بڵاوکراوەی فەرمی: لە بڵاوکراوەیەکدا کەتائیبی قەسام ڕایگەیاند: "بەهۆی سەرکێشی بنیامین ناتانیاهۆ، سەرۆکوەزیرانی ئیسرائیل و گوێڕایەڵی زامیر، سەرۆکی ئەرکانی سوپای ئیسرائیل، وێنەیەکی ماڵئاوایی بڵاودەکەینەوە لە کاتی دەستپێکردنی ئۆپەراسیۆنەکە لە غەززە."

باکگراوند: جەنگی غەززە دوای هێرشێکی حەماس بۆ سەر شارۆچکەکانی باشووری ئیسرائیل لە 7ی تشرینی یەکەمی 2023 دەستیپێکرد، کە بووە هۆی کوژرانی 1200 کەس و دەستبەسەرکردنی 251 بارمتە، بەپێی ئامارەکانی ئیسرائیل. تا ئێستا 46 لەو بارمتانە لە غەززە ماونەتەوە و پێدەچێت نزیکەی 20 ـیان لە ژیاندا بن.

کاریگەریی و لێکەوتەکان: ئەم جەنگە بووە هۆی کوژرانی زیاتر لە 65 هەزار فەڵەستینی و برینداربوونی دەیان هەزاری دیکە، برسێتیش زۆربەی دانیشتووانەکەی ناچار بە ئاوارەبوون کردووە.