هەواڵی مردنی موقتەدا سەدر ڕەتدەکرێتەوە

ئاڤا نیوز

دوای بڵاوبوونەوەی هەواڵی موقتەدا سەدر، سەرچاوەیەک لە نووسینگەکەی ناوبراو ئەو هەواڵانەی ڕەتکردەوە.

چیرۆکی سەرەکی: لە چەند کاتژمێری ڕابردوو، هەواڵی گیانلەدەستدانی موقتەدا سەدر، ڕێبەری ڕەوتی شیعە لە بەشێک لە تۆڕە کۆمەڵایەتییەکان بڵاوبووەوە، هەر زوو کاردانەوەی بەداوی خۆیدا هێنا و ڕەوتەکە هەواڵەکەیان ڕەتکردەوە.

زانیاریی بەدەستهاتوو: سەرچاوەیەک لە نووسینگەی سەدر بە میدیاکانی عێراقی ڕاگەیاندووە، "ئەو دەنگۆیانەی بڵاوبوونەتەوە، بەهۆی ئەجێندا سیاسییەکانەوەیە و هاوکاتە لەگەڵ زیادبوونی بانگەوازە جەماوەرییەکان بۆ بایکۆتکردنی هەڵبژاردنەکانی پەرلەمان".

سەرچاوەکە دووپاتی کردووەتەوە، "موقتەدا سەدر تەندروستیی باشە و تووشی هیچ نەخۆشییەک نەبووە."

زانیاریی زیاتر: موقتەدا سەدر بە یەکێک لە کاریگەرترین کەسایەتییە شیعەکانی عێراق دادەنرێت و خاوەن پێگەیەکی جەماوەریی چەندین ملیۆنییە، ڕەوتەکە لە هەڵبژاردنی ئەنجوومەنی پارێزگاکان لە 2024-12-18 بەشداریی نەکرد و هەروەها بایکۆتی هەڵبژاردنی داهاتووی پەرلەمانی کردووە.