عێراق لە 2024دا یەکێک بووە لە گەورەترین هاوردەکارانی مریشکی بەرازیلی

ئاڤا نیوز

داتا فەرمییەکان ئاماژە بۆ ئەوە دەکەن، عێراق لە لیستی ئەو وڵاتانە دێت کە زۆرترین مریشکی بەرازیلی لە ساڵی 2024دا هاوردە کردووە.

ئەوەی پێویستە بیزانیت: سەرەڕای ئەوەی عێراق خاوەنی سامانی ئاژەڵیی هەمەچەشنە، بەڵام گۆشت و مریشک و ماسی و بەرهەمە خۆراکییەکانی دیکە لە ژمارەیەکی زۆری وڵاتانی دراوسێ و ناوچەکە و جیهانەوە هاوردە دەکات.

بڵاوکراوی فەرمی: بەپێی داتا بڵاوکراوەکانی کۆمەڵەی پڕۆتینی ئاژەڵیی بەرازیلی (ABPA)، عێراق وەک یەکێک لە بازاڕە سەرەکییەکانی هاوردەکاری مریشکی بەرازیلی هاتووە، بە کۆی گشتیی 179 تۆن و 800 کیلۆگرام، ئەمەش گەشەسەندنی داواکاری عێراقی بۆ بەرهەمەکانی بەرازیل نیشان دەدات.

لەلایەکی دیکەوە: هەناردەی گۆشتی مریشکی بەرازیلی لە ساڵی 2024دا گەیشتووەتە ئاستێکی پێوانەیی، بە بڕی 5.29 ملیۆن تۆن.

ژمارەکان وادەڵێن: چین لە پلەی یەکەم هاتووە وەک گەورەترین هاوردەکاری گۆشتی مریشکی بەرازیلی، بە کۆی گشتی 562,200 تۆن لە ساڵی 2024دا، دواتر ئیمارات بە 455,100 تۆن، پاشان ژاپۆن بە 443,200 تۆن و سعودیە بە 370,800 تۆن.

ئەوەی لەبارەیەوە دەگوترێت: دەزگا تەندروستییەکانی بەرازیل دووپاتی دەکەنەوە هیچ نەخۆشی یان کێشەیەکی تەندروستی تۆمار نەکراوە کە کاریگەری لەسەر هەناردەی گۆشتی مریشک هەبێت، ئەمەش متمانەی بازاڕە نێودەوڵەتییەکان بە بەرهەمی بەرازیلی بەهێزتر دەکات.

ئەمەش بزانە: بەرازیل یەکێکە لە گەورەترین هەناردەکارانی گۆشتی مریشک لە جیهاندا، کە زیاتر لە 30%ی قەبارەی جیهانی پێکدەهێنێت و پشت بە هەمەچەشنی بازاڕە دەرەکییەکان دەبەستێت بۆ دڵنیابوون لە جێگیربوونی هەناردەی کشتوکاڵییەکانی و کەمکردنەوەی کاریگەریی گۆڕانکارییەکانی نرخی جیهانی.