ئاڤای خەڵک؛ چەک بۆ بانکەکان کراوە و دابەشکردنی ئیکرامیەی شەش مووچەکە بەردەوام دەبێت

ئاڤا نیوز

بەهۆی چەند ڕێکارێک ژمارەیەک خانەنشینی سنووری هەولێر شەش مووچەی ئیکرامییەکەیان وەرنەگرتووە، گەنجینەکان چەک و لیستیان بۆ بانکەکان ناردووە و دەبێت ئەمڕۆ دەست پێبکرێت.

چیرۆکی سەرەکی: ژمارەیەک خانەنشینی هەولێر تاوەکو ئێستا شەش مووچەکەیان خەرجنەکراوە و داوایانکردووە بەدواداچوون بۆ هۆکاری دواکەوتنی پارەکە بکرێت.

لێدوانی فەرمی: سەرچاوەیەک لە گەنجینەی هەولێر بە ئاڤای گوت، هۆکاری دواکەوتنەکە بۆ گرتنەبەری چەند ڕێکارێک دەگەڕێتەوە، هەر وەزارەتێک بە جیا لیستەکەی ئامادە دەکرێت، تاوەکو ئێستا زیاتر لە هەزار خانەنشین ناویان نێردراوە بۆ بانکەکان تێچووی ئیکرامییەکەیان پێنج ملیار دینارە، جگە لەوەی چەک بۆ بانکەکان کراوە دەبێت لەمڕۆوە دەست بە دابەشکردنی بکەن.

لەلایەکی دیکەوە: سەرچاوەیەک لە وەزارەتی دارایی و ئابووری بە ئاڤای ڕاگەیاند، هۆکاری دواکەوتنی خەرجکردنی ئیکرامیەی بەشێکی خانەنشینان بۆ نەبوونی سویلەی بانکەکان دەگەڕێتەوە، بەڵام مافی هیچ خانەنشینێک نافەوتێت، بەگوێرەی ڕیزبەندی ئەو مانگەی مامەڵەی خانەنشینیان تەواو بووە ئیکرامیەکە وەردەگرن.

ئەوەی پێویستە بیزانیت:  ئەو خانەنشینانەی 180 ڕۆژ مۆڵەتی کۆکراوەیان هەیە و شەش مووچەی بنەڕەتی ئیکرامییە دەیانگرێتەوە، خانەنشینانی سنووری سلێمانی سەرجەمیان لە مانگەکانی ڕابردوودا شەش مووچەکەیان وەرگرتووە، خانەنشینانی هەولێر و دهۆکیش وەریدەگرن.