بۆ یەکەمجار لە فێستیڤاڵی هەناری هەڵەبجەدا بەکارهێنانی پلاستیک قەدەغە کرا

ئاڤا نیوز

 

لە هەنگاوێکی ژینگەپارێزیدا، بەڕێوەبەرایەتیی گشتیی گەشتوگوزاری هەڵەبجە قەدەغەکردنی تەواوەتیی بەکارهێنانی پلاستیکی لە یازدەهەمین فێستیڤاڵی هەنار و پاییزی هەڵەبجەدا ڕاگەیاند؛ ئەمە یەکەمجارە لە مێژووی فێستیڤاڵەکەدا بڕیارێکی لەم شێوەیە دەدرێت.

 

وێنە گەورەکە؛ فێستیڤاڵی هەنار و پاییزی هەڵەبجە هەموو ساڵێک لە وەرزی پاییز و پێگەیشتنی هەنار بەڕێوەدەچێت و بۆ ماوەی سێ ڕۆژ بەردەوام دەبێت. بۆ ئەمساڵ پێشبینی دەکرێت زیاتر لە 300 هەزار گەشتیار لە ناوخۆ و دەرەوەی هەرێمی کوردستانەوە سەردانی بکەن.

 

ئەوەی ئێستا ڕوودەدات؛ ئەمڕۆ پێنجشەممە بە فەرمیی فێستیڤاڵی هەنار و پاییزی هەڵەبجە بە بەشداریی سەدان جووتیار لە پارێزگای هەڵەبجە دەستیپێکرد و، تیایدا لەو سێ ڕۆژەی کە بەردەوام دەبێت جووتیاران بەرهەمەکانیان دەخەنە بازاڕەوە.

 

لێدوانی فەرمی؛ چیا قاسم، بەڕێوەبەری گشتیی گەشتوگوزاری هەڵەبجە بە ئاڤای گوت، کە ئەم هەنگاوە لە چوارچێوەی هەڵمەتی "هەڵەبجەی شاری سەوز"دایە، کە ئامانج لێی کەم کردنەوەی کاریگەرییە زیانبەخشەکانی پلاستیکە لەسەر ژینگەی شارەکە.