نوێترین زانیاریی لەبارەی مووچەی مانگی نۆ

ئاڤا نیوز

حکومەتی هەرێمی کوردستان هەموو پابەندییەکانی خۆی جێبەجێ کردووە و ئامادەکارییەکانی بۆ ناردنی داهاتی ناوخۆ و لیستی مووچە بۆ بەغدا تەواو کردووە، چاوەڕێی بڕیاری کۆبوونەوەی سێشەممەی ئەنجوومەنی وەزیرانی عێراقە.

چیرۆکی سەرەکی: بۆ خەرجکردنی مووچەی مانگی نۆ لە پێش هەڵبژاردن، حکومەتی کوردستان هەموو پابەندییەکانی تەواو کردوون و چاوەڕێی ئەنجامی کۆبوونەوەی ئەم هەفتەیەی ئەنجوومەنی وەزیرانی عێراقە.

زانیاریی بەدەستهاتوو: حکومەتی هەرێمی کوردستان بڕی 120 ملیار دینار لە داهاتی ناوخۆیی وەک بەشێک لە پابەندییە داراییەکانی ئامادە کردووە و چاوەڕێی ڕەزامەندی بەغدایە بۆ ناردنی. هاوکات، میزان موراجەعەی مانگی نۆ، کە ڕاپۆرتی پێداچوونەوەی خەرجی و داهاتەکانی حکومەتە ئامادە کراوە.

حکومەتی کوردستان داوای کردووە پرسی مووچە لە کۆبوونەوەی ئەم سێشەممەیەی ئەنجوومەنی وەزیرانی عێراق باس بکرێت و محەممەش شیاع سوودانی ڕەزامەندی لەسەر ناردنی بدات، بۆ ئەوەی بتوانرێت پێش هەڵبژاردن دابەش بکرێت، بەڵام تا ئێستا روون نییە هەڵوێستی سوودانی چی دەبێت. 

لێدوانی فەرمی: سەرچاوەیەک لە وەزارەتی دارایی کوردستان بە ئاڤای ڕاگەیاند، لیستی مووچەی مانگی دە ئامادە کراوە و تەنیا وردبینیی کۆتایی ماوە، کە بڕیارە لە ڕۆژانی داهاتوودا تەواو بکرێت. بڕیارە ئەم هەفتەیە میزان موراجەعە و لیستی مووچەی مانگی 10 بۆ بەغدا بنێردرێن.

دەشڵیت، ئەگەر سێشەممە سوودانی بڕیاری خەرجکردنی مووچە بدات، ڕۆژی چوارشەممە 120 ملیارەکەی داهاتی ناوخۆ بە کاش بە لقی هەولێری بانکی ناوەندی دەدەن.