بەراورد بە هەڵبژاردنی پێشووی پەرلەمانی عێراق؛ پارتی زیاتر لە 47 هەزار دەنگ زیادی کردووە

ئاڤا نیوز

بەگوێرەی ئەو داتایانەی لە مەکتەبی هەڵبژاردنی پارتی بە ئاڤا دراوە، بەراورد بە هەڵبژاردنی پێشووی پەرلەمانی عێراق کە ساڵی 2021 بەڕێوەچوو، پارتی دیموکراتی کوردستان لە پڕۆسەی دەنگدانی تایبەت دا زیاتر لە 47 هەزار دەنگ زیادی کردووە.

چیرۆکی سەرەکی: ڕۆژی 9ـی ئەم مانگە، پرۆسەی دەنگدانی تایبەت بەڕێوەچوو و ڕۆژی 11ـی هەمان مانگ، دەنگدانی گشتیی بەڕێوەدەچێت، کە نزیکەی 20 ملیۆن هاووڵاتیی مافی دەنگدانیان هەیە.

زانیاریی تایبەت: بەپێی ئەو داتایانەی دەست ئاڤا کەوتوون: لە هەڵبژاردنی ئەنجوومەنی نوێنەرانی عێراق لە ساڵی 2021 دا، لە پڕۆسەی دەنگدانی تایبەت پارتی 88 هەزار و 724 دەنگی بەدەستهێنا بوو.

لە هەڵبژاردنی ڕۆژی یەکشەممە، پارتی لە دەنگدانی تایبەت 136 هەزار و 436 دەنگی بەدەستهێناوە، بەم جیاوازییەش پارتی 47 هەزار 712 دەنگ زیادی کردووە کە دەکاتە ڕێژەی 53.77%.

لەلایەکی دیکەوە: هەر بەپێی داتاکەی مەکتەبی هەڵبژاردنی پارتی دەنگی لایەنەکانی دیکە بەمجۆرە گۆڕانکاری بەسەردا هاتووە؛

-  لە هەڵبژاردنی ساڵی 2021 یەکێتی نیشتمانی کوردستان لە پڕۆسەی دەنگدانی تایبەت 56 هەزار و 882 دەنگی بەدەستهێنا بوو، بەڵام لە دەنگدانی تایبەتی ئەمساڵ 80 هەزار و 602 دەنگی بەدەستهێناوە.

بەراورد بە هەردوو هەڵبژاردنەکە، یەکێتی 23 هەزار و 720 دەنگ زیادی کردووە، واتا ڕێژەی 41.70٪.

- یەکگرتوویی ئیسلامی، لە دەنگدانی تایبەت لە هەڵبژاردنی 2021، ژمارەی دەنگەکانی دوو هەزار و 338 دەنگ بووە. بەڵام لە دەنگدانی ئەمساڵ چوار هەزار و 590 دەنگ بوو.

- لە هەڵبژاردنی ساڵی 2021 کۆمەڵی دادگەری لە پڕۆسەی دەنگدانی تایبەت هەزار و 648 دەنگی بەدەستهێنابوو، بەڵام لە دەنگدانی ئەمساڵ دەنگەکانی کەمی کردووە و  هەزار و 345 دەنگی بەدەستهێناوە.

 

- نەوەی نوێ لە هەڵبژاردنی 2021 لە دەنگدانی تایبەت هەزار و 683 دەنگی هێنا بوو. بەڵام ئەمساڵ چوار هەزار و 801 دەنگی بەدەستهێناوە.