فایەق زێدان: دەسەڵاتی دادوەریی لە پرۆسەی هەڵبژاردن ڕۆڵێکی ئەرێنیی دەبینێت

ئاڤا نیوز

سەرۆکی ئەنجوومەنی باڵای دادوەری عێراق دەڵێت، پابەندن بە بژاردەی سندووقەکانی دەنگدان بۆ ئاڵوگۆڕی ئاشتییانەی دەسەڵات و لەم بابەتەشدا دەسەڵاتی دادوەریی ڕۆڵێکی ئەرێنیی دەبینێت.

وێنە گەورەکە: ئەمڕۆ سێشەممە بەبەشداریی 20 ملیۆن و 63 هەزار و 773 دەنگدەر، پرۆسەی هەڵبژاردن بۆ خولی شەشەمی پەرلەمانی عێراق دەستیپێکرد، هەڵبژاردنەکە دوای 37 ڕۆژ لە بانگەشەیەکی گەرمی لایەنەکان بەڕێوەدەچێت، لەناو سێ پێکهاتەکەشدا 11 لیست و هاوپەیمانی کێبرکێی لەسەر بەدەستهێنانی زۆرترین کورسی دەکەن.

لێدوانی فەرمی: فایەق زێدان، سەرۆکی ئەنجوومەنی باڵای دادوەری عێراق لە وێستگەیەکی دەنگدانی تایبەت بە بەرپرسان لە بەغدا دەنگیدا و ڕایگەیاند، دەسەڵاتی دادوەریی پابەندە بە بژاردەی دیموکراسی بۆ ئاڵوگۆڕی ئاشتییانەی دەسەڵات، ئەویش لەڕێگەی دەنگی خەڵک و سندووقەکانی دەنگدانەوە.

وتیشی،  دەسەڵاتی دادوەریی بۆ سەرخستنی ئەم پرۆسە دیموکراسییە ڕۆڵێکی ئەرێنیی دەبینێت.