دیمەشق بە ژمارەیەک مووشەک کرایە ئامانج

ئاڤا نیوز

وەزارەتی بەرگریی سووریا ڕایدەگەیێنێت، بە دوو مووشەکی کاتیۆشا دیمەشقی پایتەخت کرایە ئامانج و بەهۆیەوە ژمارەیەک هاووڵاتی برینداربوون و زیانی ماددی لێ کەوتووەتەوە.

 

چیرۆکی سەرەکی: شەوی ڕابردوو هەینی لەسەر شەممە، ژمارەیەک تەقینەوە دیمەشقی پایتەختی سووریایان هەژاند و ئەمەش ترس و نیگەرانی و خستە دڵی هاووڵاتیانی شارەکە.

 

ڕاگەیێنراوی فەرمی: بەگوێرەی ڕاگەیێنراوی وەزارەتی بەرگریی سووریا، " دیمەشقی پایتەخت ڕووبەڕووی هێرشێکی ترسنۆکانە بووەتەوە، بە کەوتنی 2 مووشەکی کاتیۆشا کە لە دەوروبەری شارەکەوە ئاڕاستەی گەڕەکە نیشتەجێبوونەکانی ناوچەی مەزە و دەوروبەری کراون."

 

زانیاریی زیاتر: وەزارەتەکە ڕاشیگەیاند، بە هاوکاری وەزارەتی ناوخۆ، دەستیان بە لێکۆڵینەوە لە بارودۆخی هێرشەکە کردووە و کار بۆ کۆکردنەوەی بەڵگە و دیاریکردنی ڕێڕەو و سەرچاوەی مووشەکەکان دەکەن.

 

لەلایەکی دیکەوە: وەزارەتی بەرگریی سووریا دووپاتی دەکاتەوە "لە بەدواداچوونی بەرپرسانی ئەم کارە تاوانکارییە سڵ ناکاتەوە و ڕێوشوێنی تووند دژی هەموو ئەوانە دەگرێتەبەر کە دەستیان لە تێکدانی ئاسایشی پایتەخت هەیە."