لێکۆڵینەوە لە هۆکاری ئاگرەکەی لەنگەی هەولێر دەستیپێکرد

ئاڤا نیوز

بەدواداچوون بۆ هۆکاری ئاگرەکەی لەنگەی هەولێر دەستیپێکردووە، لێکۆڵینەوە لەگەڵ بەشێکی کارمەندانی سکویریتی ئەو شوێنە دەکرێت.

چیرۆکی سەرەکی: بەرەبەیانی ڕۆژی دووشەممە جارێکی دیکە و بە دوو قۆناغ ئاگر لە بازاڕی لەنگەی هەولێر کەوتەوە، بەهۆیەوە زیاتر لە 50 دووکان سووتان، تا ئێستا هۆکاری سەرەکی کەوتنەوەی ئاگرەکە ئاشکرا نەبووە.

زانیاری تایبەت: ڕزگار کۆچەر، پەیامنێری ئاڤا نیوز لە هەولێر ڕایگەیاند: "سەرجەم کامێراکانی چاودێری براون بۆ سەیركردنەوە و بەشێك لە کارمەندانی سکویریتی کە ئەرکی پاراستنی بازاڕی لەنگەیان لە ئەستۆیە لەلایەن هێزە ئەمنییەکانەوە لێکۆلێنەوەیان لەگەڵ دەكرێت. 

لێدوانی فەرمی: کاروان میراودەلی، گوتەبێژی بەرگری شارستانی هەولێر بە ئاڤا نیوزی گوت: "دوای جەژن ئەنجامی لێکۆڵینەوەکان ئاشکرا دەکەین."

باکگراوند: سەرەتا کاتژمێر 6:43 خولەکی بەیانی ئاگر لە بەشێکی لەنگەی هەولێر کەوتەوە، لەلایەن تیمەکانی بەرگری شارستانی  کۆنترۆڵ کرا، دواتر و  کاتژمێر 7:47 خولەک دووبارە سەریهەڵدایەوە، کاتژمێر 9:30 خولەک بەتەواوی کۆنترۆڵ کرا.