یەكەی ژمارە سێی وێستگەی كارۆئاوی دەربەندیخان بەگەڕخرایەوە

ئاڤا نیوز

یەکەی ژمارە سێی وێستگەی كارۆئاوی دەربەندیخان بەگەڕخرایەوە و تێكەڵ بە تۆڕی كارەبای نیشتمانی كرایەوە.

وێنە گەورەکە: وێستگەی كارۆئاوی دەربەندیخان، سێ یەکەی بەرهەمهێنانی کارەبای لەخۆگرتووە، لە کاتێکدا بەنداوەکەی ئاوی پێویستی تێدا بێت و هەرسێ یەکەکە بەشێوەی ئاسایی کاربکەن، هەر یەکەیەک توانای بەرهەمهێنانی 80 مێگاوات کارەبای هەیە، بەڵام ئێستا بەهۆی کەمی ئاو لە بەنداوەکە تەنیا یەک یەکەی کاری پێدەکرێت.

لێدوانی فەرمی: سیروان محەممەد، وتەبێژی بەڕێوەبەرایەتیی گشتیی کارەبای سلێمانی بە ئاڤای گوت: دوای ئەوەی بەهۆی لیکی ئاوەوە یەکەی ژمارە سێ لە وێستگەی كارۆئاوی دەربەندیخان وەستابوو، لە ماوەی نزیکەی 15 ڕۆژی ڕابردوو، بەهەوڵ و ماندوبوونی تیمەکان لە ئەندازیاران و تەکنیکاران کە بە بەردەوام کاریان لەسەر دەکرد كێشەكەیان چارەسەر كرد و یەكەكە گەڕێندرایەوە دۆخی ئاسایی خۆی.

لەلایەکی دیکەوە: كاوە ئەحمەد، بەڕێوەبەری وێستگەی كارۆئاوی دەربەندیخان وتی، پاوەر سەپلای ئیگزاتەشنی یەکەکە سووتا بوو، لەلایەن بەشی کۆنترۆڵەوە کێشەکەی دەستنیشانکرا و گۆڕدرا. لە هەندێك شوێن کێشەی ئاو هەبوو، بەشی میکانیک چارەسەریان کرد.

ئاماژەی بەوەشکرد، بەشەکانی تۆرباین و سەلامەتی پیشەیی بەردەوام لە چاودێریدابوون، بەمجۆرە ئەمرۆ توانر یەکەکە کاری پێبكرێتەوە تێكەڵ بە تۆڕی كارەبای نشتیمانی بكرێتەوە.

ئەمەش بزانە: بەنداوی دەربەندیخان لەسەر زێی سیروان دروست کراوە و لە 23-11-1961 بە فەرمی کراوەتەوە، توانای گلدانەوەی سێ ملیار مەتر سێجا ئاوی هەیە.