ئەمریكا: هەڕەشەی ئێران بۆسەر ئیسرائیل ڕاستەقینەیە

ئاڤا نیوز

کۆشکی سپی ئەمریکا ڕایگەیاند، هەڕەشەکانی ئێران بۆ ئیسرائیل بۆ تۆڵەسەندنەوەی هێرشەکەی دیمەشق کە ئیسرائیل کردیە سەر كونسوڵخانەی ئێران، ڕاستەقینەیە بەڵام قسە لەبارەی کاتەکەی ناکەین.

لێدوانی فەرمی: جۆن کێربی، گوتەبێژی کۆشکی سپی و ئەنجوومەنی ئاسایشی نیشتیمانی ئەمریکا ڕایگەیاند: تائێستا پێمان وایە هەڕەشەی چاوەڕوانکراوی ئێران ڕاستەقینە و باوەڕپێکراوە، ئەمریکا ئەوەی لەدەستی بێت دەیکات بۆ ئەوەی گرەنتی بەرگری لەخۆکردنی ئیسرائیل بکات".

زانیاریی زیاتر: جۆن کێربی ڕەتیکردەوە، قسە لەسەر کاتی هێرشە چاوەڕوانکراوەکەی ئێران بۆسەر ئیسرائیل بکات، بەڵام جەختیکردەوە ئەمریکا جدییە لە پابەندییەکانی بۆ بەرگریکردن لە ئیسرائیل و هێزەکانی ئەمریکا بە وردی لە ناوچەکە چاودێری ئێران دەکەن.

ئەوەی پێشبینی دەکرێت: پێشتر دوو بەرپرسی ئەمریکا پێشبینی ئەوەیان کردبوو، ئەمڕۆ ئێران لە ڕێگەی 100 مووشەک و درۆن هێرش بکاتە سەر چەند ناوچەیەکی سەربازی ئیسرائیل.

 

لەلایەکی دیکەوە: ڕۆژنامەی فاینەشیەڵ تایمزی بەریتانی ڕایگەیاندووە، ئێران پەیامی داوە بە وڵاتانی رۆژئاوا هێرشی تۆڵە بۆ سەر ئیسرائیل ئەنجامدەدات و سوورە لەسەر بڕیارەکەی.

باکگراوند: لە هەشتی نیسانی ئەمساڵ، ئیسرائیل بۆردوومانی كونسوڵخانەی ئێرانی لە دیمەشقی پایتەختی سووریا کرد، عەمید محەممەد ڕەزا زاهیدی فەرماندەی فەیلەقی قودس لە سووریا و لوبنان و جێگرەکەی و پێنج ئەفسەر و دیپلۆماتکاری دیکەی ئێران کوژران.