دوای نەمسا؛ فەرەنساش گەشتە ئاسمانییەکانی بۆ ئێران ڕاگرت

ئاڤا نیوز

کۆمپانیای "ئێر فرانس" لە پاڵ هێڵی ئاسمانی نەمسا بڕیاری ڕاگرتنی گەشتە ئاسمانییەکانی بۆ ئێران دا، ئەمەش بەهۆی ئەو گرژییەی کە لە ناوچەکەدا بەردەوامیی هەیە.

وێنە گەورەکە: چاوەڕوان دەکرێت لە داهاتووێکی نزیکدا ئێران وەڵامی هێرشی ئیسرائیل بداتەوە کە لە دیمەشق کونسوڵخانەکەیانی بۆردوومان کرد و بەهۆیەوە حەوت بەرپرسی باڵای سەربازی و دیپلۆماتکاری ئەو وڵاتە كوژران؛ بەمهۆیەوە هێڵی ئاسمانیی ئەڵمانیا، نەمسا و فەڕەنسا گەشتەکانیان بۆ ئێران ڕاگرتووە.

ڕاگەیێنراوی فەرمی: کۆمپانیای "ئێر فرانس" لە ڕاگەیێنراوێکدا ئاشکرای کرد، هەموو گەشتە ئاسمانییەکان بۆ ئێران ڕادەگیرێن؛ ئەو ڕێگایانەش کە بە ئاسمانی ئێراندا تێدەپەڕن بۆ سەلامەتی سەرنشین و تیمی فڕۆکەوانییەکان دەگۆڕدرێن.

ئەوەی پێویستە بیزانیت: وەزارەتی دەرەوەی فەرەنسا پێشتر داوای لە هاووڵاتییانی وڵاتەکەی کردبوو گەشت بۆ "ئێران، لوبنان، ئیسرائیل و فەڵەستین" نەکەن.

ئەمەش بزانە: دوێنێ هەینی، هێڵی ئاسمانی نەمسا لە ژێر ڕۆشنایی پەرەسەندنی گرژی و ئاڵۆزییەکانی ناوچەکە، سەرجەم گەشتەکانی لە ڤیەننا بۆ تاران تا 18ی نیسان ڕاگرت.