تورکیا داوای "هەناردەکردنەوەی نەوتی هەرێمی کوردستان" دەکات

ئاڤا نیوز 

سەرۆککۆماری تورکیا داوای هەناردەكردنەوەی نەوتی هەرێمی كوردستان دەكات، لەبەرامبەر بەردانەوەی ئاوی دیجلە كە عێراق داوای كردووە.

وێنە گەورەکە: بڕیارە 22 ی ئەم مانگە ڕەجەب تەیب ئەردۆغان سەردانی بەغدا و هەولێر بکات، چاوەڕێ دەکرێت لەم سەردانەدا ئاڵوگۆڕی خواستی هەردوو وڵات بکرێت، بەتایبەت"پرسی بەردانەوەی ئاوی دیجلە و هەناردەکردنەوەی نەوتی نەوتی هەرێمی کوردستان.

لێدوانی فەرمی:  سەرچاوەیەک لە سەرۆکایەتیی کۆماری تورکیا بە ئاڤا نیوزی ڕاگەیاند:" عێراق داوای لە تورکیا کردووە ئاوی دیجلە بەربداتەوە، بەڵام تورکیا ئەمە بێبەرامبەر ناکات و داوای هەناردەکردنەوەی نەوتی هەرێمی کورستان بۆ بەندەری جەیهان دەکات، ڕەنگە داواکاری دیکەشی هەبێت". 

لەلایەکی دیکەوە: پرسی "ڕووبەڕووبوونەوەی پەکەکە" لە سنوورەکانی هەرێمی کوردستان، داواکارییەکی دیکەی  تورکیا دەبێت بۆ دەسەڵاتدارنی بەغدا و هەولێر.

باکگراوند: ساڵێک پێش ئێستا بەهۆی سکاڵای عێراق لە دادگەی نێوبژیوانی پاریس، دادگەكە سزای یەک ملیار و 500 ملیۆن دۆلاری بەسەر تورکیادا سەپاند، بەوهۆیەوە هەناردەی نەوتی هەرێمی كوردستان ڕاگیرا.

بۆچوونی لایەنی بەرامبەر: هەرچەندە بەغدا بە پاساوی تێچووی نەوت تائێستا هەناردەكردنەوەی نەوتی هەرێمی كوردستانی دەستپێنەكردووەتەوە، بەڵام بەرپرسانی عێراق چەند جارێك ئەوەیان ڕاگەیاندووە كە دەیانەوێت هەناردەكردنەوەی نەوتی هەرێمی كوردستان دەستپێبكاتەوە.