ئەمریکا دەیەوێت ئەندامێتی فەڵەستین لە نەتەوە یەکگرتووەکان ڤیتۆ بکات

ئاڤا نیوز  

ئەمریکا ڕازی نییە فەڵەستین ببێت بە ئەندامێکی تەواو لە نەتەوە یەکگرتووەکان، پێی باشە  تەنیا وەکو چاودێرێک بمێنێتەوە.

چیرۆکە سەرەکییەکە: ئەمڕۆ لە کۆبوونەوەی نەتەوە یەکگرتووەکاندا پرسی ئەندامێتی فەڵەستین تاوتوێ کراوە، تەنانەت چەند وڵاتێک، لە ناویاندا ڕووسیا ڕایگەیاندووە کە پێویستە فەڵەستین ببێت بە دەوڵەتێکی سەربەخۆ.

زانیاریی زیاتر: سبەینێ 19ی نیسان، دەنگدان دەکرێت لەسەر ئەوەی فەڵەستین ببێت بە ئەندامی تەواوی نەتەوە یەکگرتووەکان یاخود وەکو ئەندامی چاودێر بمێنێتەوە، ئەگەر ئەندامانی ئەنجوومەنی ئاسایش دەنگ لە دژی بریارەکە بدەن، ئەوا ئەمریکا پێویستی بە ڤیتۆکردنی ئەندامێتی فەڵەستین نابێت. 

لێدوانی فەرمی: لیندا تۆماس گرینفیڵد، نوێنەری ئەمریکا لە نەتەوە یەکگرتووەکان ڕایگەیاند:''هێشتا ئەگەری چارەسەری دوو دەوڵەت لە ئارادایە، بەڵام نازانین کە ئەنجوومەنی ئاسایش ئەم پرسە یەکلا دەکاتەوە یاخود نا''. 

لە لایەکی دیکەوە: ئەمریکا چەندین جار ئاماژەی بە چارەسەری دوو دەوڵەت کردووە، بەڵام تاوەکو ئێستا تەنیا دانی بە ئیسرائیلدا ناوە وەک دەوڵەتێکی سەربەخۆ.