دوو ئەندامی هێزی کۆماندۆ بە چەقۆ لە خاوەنی کافتریایەک دەدەن

ئاڤا نیوز

 

چەكدارێكی هێزی كۆماندۆ لەگەڵ برایەكیدا هێرش دەکەنە سەر خاوەنی كافتریایەك لە قەزای بازیان لە پارێزگای سلێمانی و بە چەقۆ برینداری دەکەن.

 

چی روویدا؟ پێش دروستبوونی شەڕەکە، خاوەنی كافتریاكە قسەی لەگەڵ کردوون و گوتویەتی، ئێرە کافتریایە، تا ئێستا هیچ کێشەیەک ڕووینەداوە، بۆیە کێشەمان بۆ دروست مەکەن؛ لە وەڵامی ئەو قسانە، یەکێکیان دوو چەقۆی لێ دەدات و برینداری دەکات.

 

زانیاریی بەدەستهاتوو: سەرچاوەک لە نەخۆشخانەوە بۆ ئاڤا نیوز ئاشکرای کرد کە ئێستا باری تەندروستیی خاوەنی کافتریاکە جێگیرە.

 

زانیاریی تایبەت: ئاڤا نیوز زانیویەتی، ئەو كەسە لەگەڵ برایەکەیدا بەهۆی کێشەی درەنگ دانانی نێرگەلە لێپرسینەوەیان لە خاوەنی کافتریاکە كردووە و پێیان گوتوە، "ئێمە ئەندامی هێزی کۆماندۆین و بە کەیفی خۆمان لێپرسینەوە دەکەین".

 

ئەوەی پێویستە بیزانیت: هەردوو براکە لە هێزی کۆماندۆ ئەفسەرن و دوای ڕووداوەکە شوێنەکەیان جێهێشتووە، ئەوەش زانراوە تاوەکو ئێستاش دەستگیر نەکراون.

 

لەلایەکی دیکەوە: دەزگای ئاسایشی هەرێمی کوردستان لەبارەی ڕووداوەکەوە بە ئاڤا نیوزی گوت: "لە ڕووداوەکەدا هاووڵاتی شەڕی کردووە و ئەندامی هێزی ئەمنی نەبوونە".