قوتابییانی توشبووی شێرپەنجە لە نەخۆشخانە تاقیکردنەوە دەکەن

ئاڤا نیوز

بەپێی بڕیارێكی وەزیری پەروەردەی حكومەتی هەرێمی كوردستان، ئەو قوتابییانەی توشبووی شێرپەنجەن و تەندروستییان باش نییە دەتوانن لە نەخۆشخانە تاقیکردنەوە بکەن.

بڵاوکراوەی فەرمی: وەزارەتی پەروەردە ڕایگەیاند: هەر قوتابییەک لە هەر قۆناغێکی خوێندن، لە تاقیکردنەوەی نیشتمانی و وزاری، کە تووشبووی شێرپەنجەن و توانای تاقیکردنەوەیان هەیە، لە ڕێگەی لیژنەوە پرسیارەکانیان بۆ دەبرێتە نەخۆشخانە و لەوێ وەڵام دەدەنەوە.

ئەوەی پێوستە بیزانیت: ئەگەر نەخۆشییەکەی لە ئاستێکدا بوو نەیتوانی وەڵام بداتەوە، نمرەی تاقیکردنەوەکانی وەرزی یەکەمی بۆ دادەنرێتەوە، ئەگەر لە بەرژەوەندی بوو، یان لە خولی دووەم لەسەر نمرەی 100 تاقیکردنەوە دەکات.

بۆچی گرنگە: ئەو بڕیارەی وەزارەتی پەروەردە هاوکاری ئەو خوێندکارانە دەکات کە تووشبووی شێرپەنجەن و وا دەکات لە خوێندن سارد نەبنەوە.