کۆمەڵگەیەکی نیشتەجێبوون بۆ ئاوارەکانی شنگال دروست دەکرێت

ئاڤا نیوز

 

حکومەتی عێراق وەزارەتی وەزارەتی کۆچ و کۆچبەران ڕادەسپیرێت، ئاماری ورد لەبارەی ژمارەی ئاوارەکانی شنگال بداتە سندووقی ئاوەدانکردنەوەی قەزاکە، بە مەبەستی دروستکردنی کۆمەڵگەی نیشتەجێبوون بۆیان.

 

چیرۆکی سەرەکی: سێشەممە 7-5-2024، ئەنجوومەنی وەزیرانی عێراق بەسەرۆکایەتی محەممەد شیاع سوودانی، سەرۆکوەزیران کۆبووەوە.

 

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق ڕایگەیاند: "لە چوارچێوەی چاودێریکردنی بارودۆخی شنگال و ئاوەدانکردنەوەی ناوچە ئازادکراوەکان، ئەنجوومەنی وەزیران وەزارەتی کۆچ و کۆچبەرانی ڕاسپارد ئاماری ورد بداتە پارێزگای نەینەوا، سندووقی ئاوەدانکردنەوەی شنگال و دەشتی نەینەوا لەبارەی ژمارەی ئەو خێزانانەی لە شنگال ئاوارە بوونە، بە تایبەت ئەوانەی لە کەمپەکان نیشتەجێ بوونە".

 

زانیاریی زیاتر: نووسینگەی ڕاگەیاندنی سەرۆکوەزیران ئاماژە بەوە دەدات، پێدانی ئەو ئامارە بە ئامانجی ئەوەیە "دیزاینێک بۆ دروستکردنی کۆمەڵگەی نیشتەجێبوون ئامادە بکرێت، لەگەڵ دیاریکردنی ژمارەی یەکەکانی نیشتەجێبوونی شایستە کە پێویستە بۆیان بەردەست بێت".